अमेरिकी राष्ट्रपति डोनाल्ड ट्रम्पले एसाइलम (शरण) माथिको रोक लामो समयसम्म कायम रहने बताएका छन्।

एकजना अफगान नागरिकले ह्वाइट हाउस नजिकै दुई जना नेशनल गार्ड सदस्यलाई गोली हानेपछि ट्रम्प प्रशासनले तत्कालका लागि आश्रय (एसाइलम) का लागि परेका निवेदनमाथिको प्रक्रिया रोक्ने घोषणा गरेको थियो।

उक्त गोलीकाण्डमा घाइते भएकामध्ये एक जना नेशनल गार्डको मृत्यु भएको थियो, भने अर्का एक जनाको गम्भीर अवस्थामा उपचार भइरहेको छ।

ट्रम्पले दुखद घटनापछि शरण सम्बन्धी निर्णयमा लागेको रोक “लामो समय” सम्म कायम राख्ने आफ्नो प्रशासनको मनसाय रहेको बताएका हुन्।

कति समयसम्म रोक लाग्ने भनेर सोधिएको प्रश्नमा ट्रम्पले “कुनै समय सीमा” अहिले तोक्न नसक्ने बताए। उनले समय सीमा तोक्ने बेला नभएको तर यो रोक लामो समयसम्म कायम राख्ने योजनामा रहेको स्पष्ट पारेका छन्।

डिपार्टमेन्ट अफ होमल्यान्ड सेक्युरिटीका अनुसार यो रोक १९ देशहरूको सूचीसँग जोडिएको छ, जहाँ पहिले नै यात्रा प्रतिबन्ध लागू छ।

ट्रम्पले भने, “हामीलाई ती देशका मानिसहरू चाहिएका छैनन्। किनभने तीमध्ये धेरै मान्छे राम्रा छैनन्, खराब मानिसहरू अमेरिकामा हुनु हुँदैन।”

राष्ट्रपति ट्रम्पले गत हप्ता मारिएकी नेशनल गार्ड सदस्यको परिवारलाई ह्वाइट हाउस आउन निम्तो दिएका छन्। उनले उनका आमा–बुवासँग फोनमा कुरा गरेको बताए।

यूएस आर्मी स्पेशलिस्ट सारा बेकेस्ट्रोम बुधबार वाशिंगटन डी.सी.मा भएको गोलीकाण्डमा मारिएकी थिइन्। उनका सहकर्मी, यूएस एयर फोर्सका स्टाफ सर्जेन्ट एन्ड्र्यू वोल्फ गम्भीर अवस्थामा अस्पतालमा छन्।

होमल्यान्ड सेक्युरिटी मन्त्री क्रिस्टी नोएमले गोलीकाण्डमा संलग्न अफगान नागरिक अमेरिकामै “कट्टरपन्थी” बनेका थिए भन्दै यसको दोष बाइडेन प्रशासनले लिनुपर्ने बताएकी थिइन्। तर, तथ्य के छ भने ती व्यक्तिको शरण दाबी ट्रम्प प्रशासनकै समयमा अप्रिल २०२५ मा स्वीकृत भएको थियो।

२९ वर्षीय रहमानुल्लाह लकनवाल सीआईए. समर्थित युनिटहरूसँग काम गर्थे र २०२१ सेप्टेम्बरमा अपरेसन एलाई वेलकम कार्यक्रममार्फत अमेरिकामा आएका थिए।

अमेरिकाले आप्रवासन नीतिमा कडाई गर्न थालेपछि युरोपका विभिन्न देशहरुले आफ्ना नागरिकहरुलाई यात्रा चेतावनीहरु जारी गरेका छन् । ट्रम्प प्रशासनले विदेशी पर्यटकहरुलाई कडा गर्न थालेपछि ती युरोपियन देशहरुले यात्रा सम्बन्धी चेतावनीहरु जारी गरेका हुन् ।

अमेरिकाद्वारा सिमामा आफ्ना नागरिकहरुलाई गिरफ्तार गरी हिराशतमा राख्न थालेपछि जर्मनी, युके लगायतका देशहरुले अमेरिका यात्रा गर्दा विभिन्न प्रमाणहरु साथमै बोक्न आफ्ना नागरिकहरुलाई कडा यात्रा चेतावनीहरु जारी गरेका छन् ।

जर्मनीले आफ्ना नागरिकलाई सिमामा हिराशत र देश निकाला गरेपछि अमेरिकाको मान्य भिसाले पनि प्रवेशको ग्यारेन्टी नगर्ने हुनाले फर्कने टिकट तथा अन्य प्रमाणहरु साथमा बोक्न भनेको छ ।

युकेले बसाइको उद्धेश्यसँग मेल खाने भिसा साथमा हुँदा पनि गलत जानकारी दिएमा वा आपराधिक गतिविधिमा संलग्न भएमा गिरफ्तारी, हिराशत वा देश निकाला हुन सक्ने चेतावनी आफ्ना नागरिकहरुलाई दिएको छ ।

यूकेको विदेश मन्त्रालयले अमेरिका यात्रा गर्ने आफ्ना नागरिकहरूका लागि आफ्नो सल्लाह अपडेट गदै चेतावनीमा भनिएको छ- “आफ्नो बसाइको अभिप्रेत उद्देश्यसँग मेल खाने मान्य भिसाको साथ अमेरिकामा प्रवेश गर्नुपर्छ। अमेरिकामा आपराधिक रेकर्ड, बसाइको उद्देश्यको बारेमा गलत जानकारी, वा प्रवेश वा निकासमा उनीहरूको भिसाको थोरै म्याद नाघ्नुले पनि गिरफ्तारी, हिराशत र देश निकाला निम्त्याउन सक्छ ।”

त्यस्तै आयरल्याण्ड, नेदरल्याण्ड, बेल्जियम, डेनमार्क, फिनल्याण्ड, फ्रान्स र नर्वेले आफ्ना ट्रान्सजेण्डर नागरिकहरुलाई लैंङगिक पहिचानसम्बन्धी विशेष यात्रा मार्गदर्शनलाई अपडेट गरेको छ ।

अमेरिकी अधिकारीहरूले भिसा र इलेक्ट्रोनिक सिस्टम फर ट्राभल अथोराइजेशनका आवेदनहरूमा यात्रीको जन्मको समयको जैविक लिंग प्रतिबिम्बित हुनुपर्ने सङ्केत गरेका अधिकांश राष्ट्रहरूले चेतावनी दिएका छन् ।

यदि राहदानीमा रहेको लिंग जन्मको समयमा तोकिएको लिंगभन्दा फरक छ भने उनीहरूले अमेरिका प्रवेश अस्वीकारको सामना गर्न सक्ने वा थप जानकारीका लागि दूतावासलाई सम्पर्क गर्नुपर्ने सल्लाह दिइएको छ। त्यस्तै नर्वेले प्रवेश अवस्थाहरू कडा हुँदै गएकोमा चिन्ता व्यक्त गर्दै आफ्नो यात्रा सल्लाहको पूर्ण निरीक्षण गरेको छ । फ्रान्स र स्पेन पनि आफ्नो यात्रा सल्लाह अपडेट गर्ने तयारीमा छन्, जसले यो विषयलाई एक व्यापक युरोपेली चिन्ताको रूपमा प्रतिबिम्बित गरेको छ ।

अमेरिकी सरकारले लागू गरेको कडा आप्रवासन नियमहरू, विशेष गरी लैङ्गिक पहिचानसम्बन्धी नयाँ आवश्यकताहरूले आफ्ना नागरिकहरूलाई अमेरिकी सीमामा अनावश्यक कठिनाइ र अवरोध हुन सक्ने डरले युरोपेली राष्ट्रहरुलाई चिन्तित बनाएको छ ।

ट्रम्पको कार्यकारी आदेश अनुसार अमेरिकी अध्यागमन नीतिमा जन्मको समयको लिङ्गलाई मात्रै मान्यता दिने गरी व्यवस्था गरिएको छ । अमेरिकी नागरिकता तथा अध्यागमन सेवाले अब जैविक लिङ्ग पुरुष वा महिलालाई मात्रै मान्यता दिने छन् ।

भिसा आवेदन फारम तथा इलेक्ट्रोनिक सिस्टम फर ट्राभल अथोराइजेशनमा आवेदकले जन्मको समयको लिङ्ग उल्लेख गर्नु आवश्यक बनाइएको छ । ती नीतिहरूले जन्मको लिङ्गसम्बन्धी कुनै पनि विसङ्गति वा जानकारी नखुलाइएमा त्यसलाई अध्यागमन कानून अन्तर्गत सामग्रीको गलत प्रस्तुति मान्न सकिने चेतावनी दिएका छन्, जसले भिसा पाउनबाट स्थायी रूपमा वञ्चित गर्न सक्छ भने यही कारणले सिमामा अमेरिकी सुरक्षा अधिकारीहरुले प्रवेश अस्वीकार गर्ने संभावना रहन्छ ।

ट्रान्सजेन्डर वा आफ्नो लिङ्ग पहिचान परिवर्तन गरेका व्यक्तिहरूको लागि अमेरिका यात्रा र अध्यागमन प्रक्रियालाई जटिल र चुनौतीपूर्ण बनाएका कारण युरोपका देशहरुले आफ्ना नागरिकहरुका लागि यात्रा चेतावनीहरु जारी गरेका हुन् ।

नेशनल गार्डको गोली हानी हत्या गरिएपछि र त्यसमा एक अफगानिस्तानका नागरिकको संलग्नता प्रमाणित भएपछि ट्रम्प प्रशासनले अध्यागमन सम्बन्धी धेरै कठोर नीतिहरु घोषणा गरेको छ । ती निर्णयहरुले कानुनी अध्यागमनलाई समेत नियन्त्रण गर्ने देखिएको छ ।

नोभेम्बर २७, २०२५ मा अमेरिकाको राजधानी वाशिंटन डीसीमा भएको यो घटनाले फेरि एकपटक ट्रम्प प्रशासनलाई आप्रवासी नीतिहरुमाथि कडा निर्णयहरु गर्ने मार्गमा ल्याइदिएको छ ।

यी दुई दिनमा ट्रम्प प्रशासनले एसाइलम आवेदनहरुको सबै प्रक्रियालाई स्थगित गरेको छ भने जारी भएका ग्रिन कार्डहरुमाथि पुनः जाँच सुरु गरिएको छ । सन् २०२१ को कार्यक्रममार्फत् अमेरिका आएका सबै अफगानिस्तानका का नागरिकहरुको पुनः जाँच गर्न समेत आदेश दिइएको छ भने विश्वभरिका सबै कुटनीतिक नियोग र दुतावासहरुमा ती देशका नागरिकको भिसा आवेदन स्वीकार नगर्न निर्देशिका जारी गरिएको छ । यदि भिसा जारी भइसकेको भए रद्ध गर्न, भिसा सिस्टममा संशोधन गरी अस्वीकृत उल्लेख गर्न पनि निर्देशिकामा निर्देशन दिइएको छ ।

राष्ट्रपति ट्रम्पले वासिङ्टन, डीसीको सुरक्षा बढाउन ५०० थप नेशनल गार्ड सदस्यहरूलाई तैनाथ गर्न आदेश दिएका छन् ।

यस्तै ट्रम्प प्रशासनले आप्रवासीलाई दिँदै आएको विभिन्न कर छुट लगायतका सुबिधाहरु पनि कटौती गर्ने तयारी गरेको छ । अर्थमन्त्री स्कट बेसेन्टले राष्ट्रपति डोनाल्ड ट्रम्पको निर्देशनअनुसार यो कदम अघि बढाइएको बताएका छन् ।

अर्थ मन्त्रालयले अर्जित आम्दानी कर क्रेडिट, अतिरिक्त बाल कर क्रेडिट, अमेरिकन अपोर्चुनिटी कर क्रेडिट तथा सेभर्स म्याच क्रेडिटको फिर्ता हुने भाग गैर कानुनी तथा गैर–योग्य आप्रवासीलाई उपलब्ध नहुने व्यवस्था स्पष्ट पार्ने तयारी भएको जनाएको छ ।

नेशनल गार्डमाथिको आक्रमण लगत्तै ट्रम्पले कडा प्रतिक्रिया दिँदै यसलाई आतंकवादी कार्य भनेका थिए भने घटनामा संलग्नलाई मृत्युदण्ड दिइनुपर्ने बताएका थिए । उनले अध्यागमन प्रणालीको आलोचना गरेका थिए भने कडा अध्यागमन प्रणाली लागु गर्ने प्रतिवद्धता जनाएका थिए । जसको परिणामस्वरुप अहिले कडा अध्यागमन नीतिहरु सार्वजनिक भइरहेका छन् ।

हुन त यी नीतिहरु केबल डीसी घटनाका उपजमात्रै होइनन्, राष्ट्रपति ट्रम्पले यसअघि थुप्रै राज्यहरुमा आइसद्वारा व्यापक कारवाहीहरु गराएका छ्न भने निर्वाचनताका लाखौँ आप्रवासीहरुलाई अमेरिकाबाट हटाउने उनको घोषणा थियो । उनले अध्यागमन प्रतिवन्धहरु लगाउने घोषणा पनि गरेका थिए ।

अमेरिकाको क्यालिफोर्नियास्थित स्टकटन सहरमा एक बालकको जन्मदिनको पार्टीको क्रममा गोली चल्दा चार जनाको मृत्यु भएको छ । शनिबार साँझ एक रेस्टुरेन्टमा भएको घटनामा दश जना घाइते भएका छन् ।

स्थानिय प्रहरीका अनुसार घटनाका पीडितहरूमा वयस्क र बालबालिका दुवै समावेश छन्। घाइतेहरूको अवस्थाबारे भने विस्तृत जानकारी सार्वजनिक गरिएको छैन । गोली चलाउने व्यक्ती अझै फरार रहेको र घटना “लक्षित” रूपमा गराइएको हुनसक्ने प्रहरीले अनुमान गरेको छ ।

सान जोआक्विन काउन्टी शेरीफ कार्यालयका अनुसार घटना स्थानीय समय अनुसार करिब शनिबार साँझ ६ बजेतिर भएको हो। प्रहरीले घटनाबारे कुनै प्रकारको जानकारी, भिडियो वा प्रत्यक्षदर्शीहरूको बयान माग गर्दै सार्वजनिक सहयोगका लागि आग्रह गरेको छ।

शेरीफ कार्यालयकी प्रवक्ता हेधर ब्रेन्टले घटनालाई “अकल्पनीय” भन्दै अहिले अनुसन्धान चलिरहेको र उपलब्ध जानकारी सीमित रहेको बताइन्। प्रारम्भिक अनुसन्धानले यो लक्षित आक्रमण हुनसक्ने देखिएको उनको भनाइ छ।

स्टकटनकी मेयर क्रिस्टिना फुगाजिले घटनाप्रति दुख व्यक्त गर्दै यसलाई अस्वीकार्य भनेकी छिन् । “परिवारहरू यस्तो अवस्थामा अस्पताल धाउनुपर्ने होइन। उनीहरू आफ्नो प्रियजनको जीवनको लागि प्रार्थना गर्दै होइन, एकसाथ बस्नुपर्ने समय हो,” उनले भनिन्।

अमेरिकी रक्षा मन्त्री पिट हेगसेथले क्यारिबियन सागरमा भएको सैन्य कारबाहीमा सबै मानिसलाई मार्ने आदेश दिएको भन्ने आरोपलाई पूर्ण रूपमा अस्वीकार गरेका छन्। उनले ती आरोपहरूलाई भ्रामक समाचार (फेक न्यूज) भन्दै आलोचना गरेका छन्।

उनले डुंगामा रहेका मानिसहरूलाई लक्षित गरी गरिएका प्रहारहरू “अमेरिकी तथा अन्तर्राष्ट्रिय दुवै कानुनअनुसार वैध” रहेको दाबी गरे।

हेगसेथले अमेरिकी सैनिकहरूलाई बदनाम गर्न बनाइएका मनगढन्ते, उत्तेजक र अपमानजनक रिपोर्टहरू भएको भन्दै आलोचना गरे। उनले अमेरिकी सैनिकको मनोबल कमजोर बनाउने गरी गलत समाचार (फेक न्यूज) नबनाउन पनि आग्रह गरेका छन्।

केही वर्तमान तथा पूर्व अमेरिकी अधिकारी र विशेषज्ञहरूले ट्रम्प प्रशासनद्वारा क्यारिबियन सागरमा गरिएका मिसाइल प्रहारहरू गैरकानुनी हुनसक्ने बताएका छन्।

अहिलेसम्म ८० भन्दा बढी मानिस मारिइसकेका छन् र कम्तीमा २२ वटा डुंगाहरूलाई निशाना बनाइएको छ।

यसअघि, अमेरिकी सरकारले लागू औषध तस्करीमा संलग्न डुंगाहरूलाई रोकेर तस्करहरूलाई पक्राउ गरी अदालतमा पेस गर्दै आएको थियो।

ट्रम्प प्रशासनले क्यारिबियन सागरका सबै डुंगामा रहेका व्यक्तिलाई ड्रग तस्कर भन्दै आएको छ। उनीहरू प्रायः भेनेजुएलाको ग्याङ “ट्रेन दे आरागुआ” का सदस्य भएको दाबी गर्दै अमेरिकाले यो आरोप लगाउँदै आएको हो।

हेगसेथले सामाजिक सञ्जालमा लेखेका छन्, “आक्रमणको उद्देश्य घातक ड्रगहरू रोक्नु, नार्को डुंगाहरू नष्ट गर्नु, र अमेरिकीहरूलाई विष दिने नार्को–आतङ्ककारीहरूलाई मार्नु हो।” उनले थपेका छन्, “हामीले मारेका प्रत्येक तस्कर आतङ्कवादी सूचीमा परेको सङ्गठनसँग सम्बन्धित छन्।”

यस वर्ष ट्रम्प प्रशासनले ट्रेन दे आरागुआलाई आतङ्कवादी सङ्गठन घोषणा गरेको थियो। प्रशासनले भेनेजुएलाका राष्ट्रपति निकोलास मदुरोलाई पनि ‘कार्टेल दे लोस सोलेस’ नामक तस्करी सञ्जालका प्रमुखको रूपमा आरोप लगाएको छ।

भेनेजुएलासहित केही देशहरूले क्यारिबियन सागरमा भएका अमेरिकी हमलाहरूलाई ‘न्यायिक प्रक्रिया बिना गरिएको हत्या’ भन्दै आपत्ति जनाउँदै आएका छन्।