अमेरिकाको अष्टिन सहरमा भएको गोलीकाण्ड आतंकवादी घटना हुनसक्ने भन्दै संघीय अनुसन्धान ब्युरो (एफबीआई) ले अनुसन्धान तीव्र बनाएको छ। एफबीआईले यस घटनामा आतंकवादसँग सम्बन्धित सम्भावित कोणबारे सूक्ष्म अध्ययन गरिरहेको जनाएको छ।

शंकास्पद व्यक्तिको गाडी र घरबाट केही यस्ता सामग्री फेला परेका छन्, जसले “आतंकवादसँग सम्भावित सम्बन्ध” रहेको संकेत गर्ने अधिकारीहरूको भनाइ छ। प्रहरीले मारिएका शंकास्पद हमलाकारीको पहिचान सेनेगलमा जन्मिएका अमेरिकी नागरिक एनडियागा डियाग्नेका रूपमा पुष्टि गरेको छ।

आइतबार बिहान एक ‘बार’ बाहिर भएको गोलीकाण्डमा दुई जना युवाको ज्यान गएको थियो। प्रहरीका अनुसार १९ वर्षीय राइडर ह्यारिङ्टन र २१ वर्षीया सविथा शनको घटनास्थलमै मृत्यु भएको हो। घटनामा एक दर्जनभन्दा बढी व्यक्ति घाइते भएका छन्, जसमध्ये दुई जनाको अवस्था अझै गम्भीर छ।

यो घटना विश्वविद्यालयका विद्यार्थीहरूमाझ लोकप्रिय बुफोर्डस् बार बाहिर बिहान करिब २ बजे भएको थियो।

प्रारम्भिक अनुसन्धानअनुसार, एसयूभी गाडीमा आएका बन्दुकधारीले गाडी रोकेर अचानक भीडतर्फ गोली चलाएका थिए। त्यसपछि उनी गाडीबाट निस्केर राइफल बोक्दै पुनः बारतर्फ अघि बढेका थिए। घटनास्थल नजिकै गस्तीमा रहेका प्रहरी अधिकारीहरूले उनलाई नियन्त्रणमा लिन खोज्दा जवाफी कारबाहीमा उनी मारिएका थिए।

अधिकारीहरूका अनुसार प्रहरी घटना भएको ५७ सेकेन्डभित्रै घटनास्थल पुगेका थिए, जसका कारण थप मानवीय क्षति हुनबाट जोगिएको विश्वास गरिएको छ।

टेक्सासको राजधानी अष्टिनमा अवस्थित ‘युनिभर्सिटी अफ टेक्सास’ का करिब ५५ हजार विद्यार्थीहरू प्रायः सोही क्षेत्रमा जाने गर्दछन्।