काठमाडौं । जारी दोस्रो संस्करणको नेपाल प्रिमियर लिग (एनपीएल) खेल्न दक्षिण अफ्रिकाका पूर्व कप्तान तथा विश्वविख्यात ब्याटर फाफ डु प्लेसिस भोली सोमबार नेपाल आइपुग्ने भएका छन् । दोस्रो संस्करणको एनपीएलका लागि विराटनगर किंग्समा अनुबन्ध भएका फाप डु जारी प्रतियोगिताको १८ खेल सम्पन्न भएपछि नेपाल आउन लागेका हुन् ।

मार्की तथा कप्तान सन्दीप लामिछानेको नेतृत्वमा जारी सिजन विराटनगरले फाप डु प्लेसिस बिनै ५ खेल खेल्दै ८ अंकका साथ तालिकाको दोस्रो स्थान ओगटेर बसेको छ । यसअघि इन्डियन प्रिमियर लिग (आइपीएल) को आगामी सिजन नखेल्ने निर्णय गरेसँगै एनपीएल पनि खेल्न नआउने हो कि भन्ने आशंकाकाबिच फाप डु प्लेसिस नेपाल आउन लागेका हुन् ।

फाप डुको यो कदमले एनपीएललाई अन्तर्राष्ट्रिय स्तरमा चिनाउने अवसर प्रदान गरेको छ ।
४१ वर्षीय यो स्टार खेलाडीले दक्षिण अफ्रिकाका लागि क्रिकेटका तीन वटै फम्र्याटमा उत्कृष्ट प्रदर्शन गरेका छन् । उनको अनुभव र नेतृत्व क्षमताले विराटनगर किङ्सलाई दोस्रो सिजनको एनपीएलको च्याम्पियन बनाउने आशा गरिएको छ ।

को हुन् फाप डु प्लेसिस ?

फ्रान्स्वा फाप डु प्लेसिसको जन्म १३ जुलाई १९८४ मा दक्षिण अफ्रिकाको प्रिटोरियामा भएको थियो । उनी दाहिने हातका मिडल–अर्डर ब्याटर र दाहिने हातका लेग–ब्रेक बलर हुन् । विश्व क्रिकेट इतिहासमा उनी उत्कृष्ट फिल्डरहरूमध्ये एक मानिन्छन् । उनले अफ्रिकान्स होएर सेन्स्कुल र युनिभर्सिटी अफ प्रिटोरियाबाट शिक्षा हासिल गरेका थिए ।

फाप डुले सन् २०११ को १८ जनवरी का दिन भारतविरुद्ध एकदिवसीय अन्तर्राष्ट्रिय (ओडीआई) मा डेब्यू गरेका थिए, जहाँ उनले नटआउट ६० रन बनाए । त्यस्तै उनको टेस्ट डेब्यू सन् २०१२ को २३ नोभेम्बरका दिन अस्ट्रेलियाविरुद्ध एडिलेड ओभलमा भएको थियो, जसमा उनले पहिलो इनिङ्समै नटआउट ११० रन बनाएर म्यान अफ द म्याच बनेका थिए ।
उनी तीनै फम्र्याटमा शतक बनाउने पहिलो दक्षिण अफ्रिकी खेलाडी पनि हुन् । सन् २०१६ मा उनी कप्तान हुँदा तीनै फम्र्याटमा शतक बनाउने पहिलो खेलाडी बनेका हुन् । त्यस्तै सन् २०१७ मा उनले श्रीलंकाविरुद्ध १८५ रन बनाए, जुन दक्षिण अफ्रिकाको दोस्रो उच्चतम ओडीआई स्कोर पनि हो ।

कप्तानका रूपमा उनको जीत प्रतिशत ओडीआईमा ७३.६८ प्रतिशत रहेको छ । उनी सन् २०१६ अस्ट्रेलियालाई तीनै फम्र्याटमा हराउने पहिलो अन्तर्राष्ट्रिय कप्तान बनेका थिए । त्यस्तै सन् २०१७ मा उनले विश्व इलेभेनको कप्तानी पनि गरे र २०२१ को १७ फेब्रुअरी का दिन टेस्ट क्रिकेटबाट सन्यास लिए ।

उनले समग्र टी–२० करियरमा ४२४ म्याच खेलेर ११ हजार ९ सय ६ रन बनाएका छन् र २११ क्याच लिएका छन्, जसले उनलाई विश्वका उत्कृष्ट फिल्डरहरूमध्ये एक बनाएको छ । त्यति मात्र होइन फाप डु फ्रेन्चाइज क्रिकेटका स्टार पनि हुन् । उनले चेन्नई सुपर किङ्स, राइजिङ पुणे सुपरजायन्ट, रोयल च्यालेन्जर्स बैंगलोर, टेक्सास सुपर किङ्स, सेन्ट लुसिया किङ्सलगायतका टिमबाट १५४ वटा आइपिएलका खेल खेलेका छन् ।

आइपीएलमा उनले ४७ सय रन बनाउँदा ३९ पटक अर्धशतक पूरा गरेका छन् । त्यस्तै उनले चेन्नईबाट सन् २०१८ र २०२१ मा उपाधि समेत जितेका छन् । सन् २०१९ मा पर्ल रक्सलाई मजान्सी सुपर लिग जिताए, जहाँ उनी ३१८ रनसहित सर्वाधिक रनकर्ता पनि बनेका थिए । जुलाई २०२५ मा टेक्सास सुपर किङ्सको कप्तानी गर्दा उनी टी–२० इतिहासका सर्वाधिक रन बनाउने कप्तान बने ।