काठमाडौँ । नेपाली कांग्रेसको जारी विशेष महाधिवेशन पक्षले पार्टीको संस्थापन पक्षलाई सहमतिका लागि ८ बुँदे प्रस्ताव पठाएको छ। वार्ता समितिका सदस्य एवं केन्द्रीय सदस्य प्रदीप पौडेलका अनुसार बुधबार बिहान संस्थापन पक्षलाई उक्त प्रस्ताव औपचारिक रूपमा पठाइएको हो। पार्टीभित्रको आन्तरिक विवाद समाधान र भावी कार्यदिशाका लागि यो प्रस्ताव महत्वपूर्ण मानिएको छ।

प्रस्तावमा सभापति शेरबहादुर देउवाले कार्यकारी भूमिकाबाट बाहिरिनुपर्ने र विशेष महाधिवेशनको स्वामित्व लिनुपर्ने मुख्य सर्त राखिएको छ। त्यस्तै, आगामी निर्वाचनका लागि प्रधानमन्त्रीको उम्मेदवार अहिले नै तय गर्नुपर्ने, कुनै पनि दलसँग चुनावी गठबन्धन नगर्ने र टिकट वितरणका लागि सर्वस्वीकार्य संसदीय बोर्ड गठन गर्नुपर्ने माग गरिएको छ।

निर्वाचनलाई लक्षित गरी ५ सदस्यीय उच्चस्तरीय संयन्त्र गठन गर्नुपर्ने र उम्मेदवारको टिकटमा सभापति देउवाले हस्ताक्षर गर्न नपाउने विषयलाई पनि प्रस्तावमा जोड दिइएको छ। यसका साथै विशेष महाधिवेशनमा पेस भएका विभिन्न प्रतिवेदनहरूलाई पार्टीको साझा पुँजीको रूपमा ग्रहण गर्नुपर्ने उल्लेख गरिएको छ।