काठमाडौँ। प्रतिनिधिसभा सदस्य निर्वाचनका लागि देशैभरको निर्वाचन तयारी अन्तिम चरणमा पुगेको छ।

यसैक्रममा जुम्लाको निर्वाचन तयारी पनि अन्तिम चरणमा पुगेको छ। जिल्ला निर्वाचन कार्यालयबाट निर्वाचनमा आवश्यक पर्ने सबै निर्वाचन सामाग्री लिएर मतदान केन्द्रमा खटिएका कर्मचारी पुगिसकेका जिल्ला निर्वाचन कार्यालय जुम्लाका निर्वाचन अधिकारी दीपेन्द्र कँडेलले जानकारी दिए।

जिल्लाका ११० वटा मतदान केन्द्रमा सोमबार साँझसम्म मतपत्र, मतपेटिकालगायत निर्वाचन सामग्री लिएर मतदान अधिकृतको नेतृत्वमा खटिएका सबै कर्मचारी र सुरक्षाकर्मी पुगिसकेका कार्यालयका सहायक निर्वाचन अधिकृत हरिकृष्ण तिमिल्सेनाले जानकारी दिए।

२१ फागुनमा हुने निर्वाचनका लागि आवश्यक पर्ने मतपत्र मुख्य निर्वाचन अधिकृतको कार्यालयबाट र अन्य ५१ प्रकारका सामग्री जिल्ला निर्वाचन कार्यालयबाट मतदान अधिकृतलाई बुझाइएको जिल्ला निर्वाचन कार्यालयले जनाएको छ। जिल्लाभर ११० मतदान केन्द्र र ८५ वटा मतदानस्थल कायम गरिएका छन् भने ६५४ कर्मचारी निर्वाचनका लागि परिचालन भएका छन्। जिल्लामा कुल मतदाता ७१ हजार ७३९ जना रहेका निर्वाचन कार्यालयले जनाएको छ।

नतिजा आउन कति समय लाग्ला?

सुरक्षा विश्लेषणका आधारमा मतदानस्थलको सुरक्षा प्रबन्धलाई चुस्त र प्रभावकारी बनाइएको छ। सेना, नेपाल प्रहरी, सशस्त्र प्रहरी र राष्ट्रिय अनुसन्धान विभागको जनशक्ति निर्वाचनको सुरक्षामा खटिने प्रमुख जिल्ला अधिकारी दीपक पौडेलले बताए।

उनका अनुसार एकीकृत निर्वाचन सुरक्षा योजनाबमोजिम नेपाल प्रहरी मतदानस्थलको भित्री घेराको सुरक्षामा खटिनेछन्। निर्वाचन प्रहरी पहिलो तहको सुरक्षा घेरामा, दोस्रो तहको सुरक्षा घेरामा सशस्त्र प्रहरी बल र सुरक्षा घेराको बाहिरी तहबाट सेनाले सुरक्षा प्रदान गर्नेछन्।

बागलुङमा मतदानस्थलमा खटिए कर्मचारी
बागलुङमा निर्वाचनमा खटिने कर्मचारी तथा सुरक्षाकर्मी निर्वाचन सामग्री बुझेर मतदान केन्द्रमा पुगेका छन्। दुई निर्वाचन क्षेत्र रहेको बागलुङमा १०७ मतदातस्थलमा निर्वाचन सामग्रीसहित कर्मचारी र सुरक्षाकर्मी खटिएका मुख्य निर्वाचन अधिकृतको कार्यालयका प्रमुख सीता शर्मा अधिकारीले जानकारी दिइन्।

उनका अनुसार मतदान अधिकृत, सहायक मतदान अधिकृत र अन्य कर्मचारी, सुरक्षाकर्मीको टोलीसहित निर्वाचन सामग्री एकसाथ पठाइएको हो। सोमबार साँझसम्म सबै मतदानस्थलमा कर्मचारी पुगिसकेका जनाउँदै उनले निर्वाचन क्षेत्र १ मा ११५ मतदान केन्द्र र २ मा ११५ केन्द्र तोकिएको बताइन्। यहाँ दुई अस्थायी मतदान केन्द्र पनि कायम गरिएको उनको भनाइ छ। बागलुङमा एक लाख ९३ हजार ३८१ जना मतदाता छन्।

मुस्ताङमा पनि सबै तयारी पूरा
प्रतिनिधिसभा सदस्य निर्वाचनका लागि हिमाली जिल्ला मुस्ताङमा सबै तयारी पूरा भएको छ। मुख्य निर्वाचन अधिकृतको कार्यालयले निर्वाचनमा खटिने कर्मचारीलाई ५१ प्रकारका निर्वाचन सामग्रीसहित सम्बन्धित निर्वाचन केन्द्रमा खटाइसकेको हो। माथिल्लो र तल्लो मुस्ताङसहित ३९ वटा मतदान केन्द्रका लागि कर्मचारी खटिएका मुख्य निर्वाचन अधिकृतको कार्यालयका सहायक मतदान अधिकृत दीपेन्द्र पौडेलले जानकारी दिए।

यसैबीच मुस्ताङका ३९ वटै मतदान केन्द्रमा सडकको पहुँच पुगेकाले मतदान कार्यक्रम र निर्वाचन सुरक्षाका लागि कुनै किसिमको असहज नहुने जिल्ला प्रहरी कार्यालयका प्रहरी निरीक्षक सन्तोष बस्यालले जानकारी दिए। सोमबारदेखि हिमपात रोकिएपछि अवरुद्ध साङ्ता मतदान केन्द्रको सडक पनि सञ्चालन भएकाले मतदान तथा मतपेटिका सदरमुकाम ढुवानी गर्नमा समस्या नरहने उनले बताए।

त्यसैगरी रौतहटका चारवटै निर्वाचन कार्यालयले वितरण गरेका निर्वाचन समाग्री जिल्लाभरिका मतदान केन्द्रमा पुगेका छन्। जिल्ला निर्वाचन कार्यालयका प्रमुख छोटेलाल दासका अनुसार रौतहटका चारवटा निर्वाचन क्षेत्रका ५४१ वटा मतदान केन्द्रमा मतपत्र, मतदान गर्ने बाक्सासहित सम्पूर्ण समाग्री पुगेका हुन्।

आचारसंहिताको धज्जी

जिल्ला निर्वाचन कार्यालयका अनुसार रौटहटमा तीन हजार २४६ कर्मचारी निर्वाचनमा खटिएका छन्। यहाँ २७७ वटा मतदानस्थल तोकिएका छन्। यहाँ चार लाख ३६ हजार ६११ जना मतदाता छन्।

त्यस्तै मोरङका ६ वटै निर्वाचन क्षेत्रमा मतपत्र, मतपेटिकासहितका निर्वाचन सामग्री पुगिसकेका छन्। मोरङका ३०६ मतदानस्थलका ८८८ मतदान केन्द्रमा निर्वाचनका लागि कर्मचारी खटिएका प्रदेश निर्वाचन कार्यालय विराटनगरका प्रमुख चोलाराज दंगालले जानकारी दिए।

जिल्ला कारागार मोरङ र आदर्श पुस्तकालयमा रहने अस्थायी मतदान केन्द्रका लागि छुट्टै कर्मचारीको प्रबन्ध गरिएको प्रदेश निर्वाचन अधिकारी दंगालको भनाइ छ। उनले भने, “तारजाली घेरेर, सीसीटीभी राखेर मतगणनाका लागि तयारी सुरु गरिएको छ।”

भोजपुरका १६१ मतदान केन्द्रमा ९६० कर्मचारी खटिए
प्रतिनिधिसभा सदस्य निर्वाचनलाई व्यवस्थित, निष्पक्ष र शान्तिपूर्ण रूपमा सम्पन्न गराउन भोजपुरमा ९६० कर्मचारी परिचालन गरिएको छ। जिल्ला निर्वाचन कार्यालयका प्रमुख डिकेन्द्र सुवेदीका अनुसार अस्थायी र स्थानीय गरी १६१ मतदान केन्द्र कायम गरिएका छन्। तीमध्ये १५९ मतदान केन्द्रमा मतदान अधिकृत र सहायक मतदान अधिकृतसहित प्रतिकेन्द्र ६ जनाका दरले कर्मचारी खटाइएको छ।

त्यस्तै दुई अस्थायी मतदान केन्द्रमा मतदान अधिकृत र सहायक मतदान अधिकृतसहित प्रतिकेन्द्र तीनजनाका दरले कर्मचारी परिचालन गरिएको उनले जानकारी दिए। खटिएका कर्मचारी तोकिएका स्थानमा जाने काम भइरहेको जिल्ला निर्वाचन कार्यालयले जनाएको छ। मतदान प्रक्रिया, मतपेटिका व्यवस्थापन, मतदाता पहिचान, मतगणनालगायत विषयमा कर्मचारीलाई स्पष्ट निर्देशन दिइएको कार्यालयले जनाएको छ।

यसैबीच निर्वाचनलाई लक्षित गरेर यहाँ मदिरा बिक्री वितरणमा रोक लगाइएको छ। निर्वाचनलाई स्वच्छ, निष्पक्ष तथा भयरहित वातावरणमा सम्पन्न गराउन २२ फागुनसम्म मदिरा बिक्रीवितरण निषेध गरिएको प्रमुख जिल्ला अधिकारी राजन पौडेलले जानकारी दिए। -रासस