काठमाडौँ। सर्लाही धनकौल गाउँपालिका २ का ५० वर्षीय रामकिशोर सिंहको हत्या आरोपमा प्रहरीले दुई जनालाई पक्राउ गरेको छ।

पक्राउ पर्नेमा वीरगन्ज महानगरपालिका २२‚ मनियारीका २१ वर्षीय राजनकुमार राम र ३२ वर्षीय प्रमोद साह छन्। ११ मंसिरको राति सवा १० बजे हत्या गरेको अवस्थामा सिंहको शव फेला परेपछि प्रहरीले अनुसन्धान थालेको थियो। यसक्रममा दुईजना व्यक्ति पक्राउ परेको बारा प्रहरी प्रमुख प्रहरी उपरीक्षक नरेन्द्र कुँवरले बताए।

बारा प्रसौनी गाउँपालिका ६‚ भलुही चोकमा रहेको किरण एभरेज नेपाल प्रालि नामक पानी फ्याक्ट्रीनजिकैको खाल्डोमा सिंहको छुरा प्रहार गरी हत्या भएको अवस्थामा शव फेला परेको थियो। सिंह त्यही फ्याक्ट्रीमा काम गर्थे।

गढीमाई मेलामा विवाद, पानी महँगोमा बेचेको निहुँ
प्रहरी उपरीक्षक कुँवरका अनुसार पक्राउ परेका दुईमध्ये राम सोही फ्याक्ट्रीमा काम गर्थे। उनी फ्याक्ट्रीमा सवारी चालकको रूपमा कार्यरत थिए। रामले गत वर्ष गढीमाई मेलामा फ्याक्ट्रीको गाडीको क्लच प्लेट जलाएपछि सिंहसँग झगडा भएको थियो। “झगडापछि रामले काम छाडेर गए,” कुँवर भन्छन्।

छाडेर गएका राम फेरि १ कात्तिक २०८२ देखि काममा फर्किए। १० मंसिरसम्म रामले काम गरेका थिए। चालककै रूपमा काम गर्ने रामले फ्याक्ट्रीले तोकेको भन्दा बढी मूल्यमा पानी बेचेको आरोप लाग्यो। फ्याक्ट्रीले एक दर्जन पानीको मूल्य ११० रुपैयाँ तोकेको थियो। रामले आफ्नो व्यक्तिगत मुनाफाको लागि पानी ११५/१२० रुपैयाँमा बजारमा बेचेको सिंहले थाहा पाए।

उनले उक्त कुरा साहुलाई सुनाए। त्यही दिनबाट रामलाई साहुले कामबाट हटाए। कामबाट निकालिएपछि राम वीरगन्जस्थित घर गए। “सोही रिसइबीलाई लिएर रामले आफ्ना साथी प्रमोद साह तुरहासँग बसेर मदिरा खाएपछि हत्या गर्ने योजना बनाए,” कुँवर भन्छन्, “यसपछि दुवै बारा आएर फ्याक्ट्रीमै रहेका सिंहलाई छुरा र इँटाले प्रहार गरी हत्या गरेको देखिन्छ।”

घटनापछि अनुसन्धान थालेको प्रहरीले १२ मंसिरको बिहान करिब ८ बजे दुवैलाई पर्साबाट पक्राउ गरेको थियो। राम छिपहरमाई गाउँपालिका ५‚ भिस्वाको नाकाबाट भारत भागिरहेका थिए। तुरहा भने वीरगन्ज महानगरपालिका २२ मा लुकिछिपी बसिरहेका थिए। “पक्राउ परेका दुवैलाई कर्तव्य ज्यान कसुर मुद्दामा बारा जिल्ला अदालतबाट सात दिन हिरासतमा राख्न अनुमति लिएर अनुसन्धान थालेका छौँ,” कुँवरले भने।