विराटनगर। नेपालमा पहिलोपटक जिप्सम बोर्डको व्यावसायिक उत्पादन हुने भएको छ।

भवन तथा विभिन्न पूर्वाधारमा फल सिलिङ, पार्टेसन, लगायत कार्यमा प्रयोग हुने जिप्सम बोर्डको उत्पादन गर्ने उद्योग नेपालमा हालसम्म नरहेकामा अरिहन्त इन्फ्रास्ट्रक्चर लिमिटेडले हात हाल्न लागेको हो।

दुई वर्षदेखि निमाटो ब्रान्डमा टाइल्स उत्पादन गरिरहेको विराटनगरको अरिहन्त ग्रुप अफ कम्पनीज अन्तर्गतको अरिहन्त इन्फ्रास्ट्रक्चर लिमिटेडले जिप्सम बोर्ड उत्पादनका लागि अहिले धमाधम काम गरिरहेको छ।

कम्पनीले कारखाना परिसरमा छुट्टै युनिट तयार गरी मेसिन जडान गरिरहेको छ। मेसिन जडानको काम अन्तिम चरणमा पुगेको कम्पनीका निर्देशक जयेश लुनियाँले जानकारी दिए।

उनका अनुसार कम्पनीले थप ५० करोड लगानी गरी जिप्सम बोर्ड उत्पादन गर्न लागेको हो। उद्योग आगामी पुसको पहिलो हप्ताभित्र व्यावसायिकरूपमा जिप्सम बोर्ड उत्पादन गर्ने योजनामा छ।

‘कुनै बेला आयातित टाइल्स नेपालको खुद्रा बजारमा सामान्यतया प्रति वर्गफिट ३०० रुपैयाँमा बिक्री हुन्थ्यो। अहिले नेपालमा नै उत्पादनका कारण १२० रुपैयाँमा पाइन थालेको छ। मूल्य सस्तिएका कारण उपभोक्ताले टाइल्स प्रयोग गर्ने क्रम बढेको छ। हामीले उत्पादन थालेपछि जिप्सम बोर्डको हकमा पनि त्यही हुन्छ,’ उद्योगी लुनियाँले भने।

विराटनगरमा जिप्सम बोर्डका आयातकर्ता एवम् सप्लायर लोकेश अग्रवालका अनुसार अहिले पूर्वमा भारत र समुद्रपारका मुलुकबाट आयातित जिप्सम बोर्ड बिक्री हुने गरेको छ।

व्यवसायी अग्रवालले भारतीय जिप्सम बोर्ड प्रति गोटा ६५० देखि ७५० रुपैयाँ र समुद्रपारबाट आयातित जिप्सम बोर्ड प्रति गोटा ८०० देखि ९०० रुपैयाँमा बिक्री गरिरहेका छन्। सामान्यतया जिप्सम बोर्डको लम्बाइ ६ फिट र चौडाइ ४ फिट हुन्छ।

अरिहन्तका सञ्चालक लुनियाँले आफ्नो उद्योगले उत्पादन गर्ने जिप्सम बोर्डको मूल्य अहिलेको बजार भाउ भन्दा ५० प्रतिशतसम्म सस्तो हुने बताए। मूल्य आधा सस्तो हुने भएकाले आफ्नो उत्पादनले बजार लिनेमा लुनियाँ विश्वस्त छन्।

उनले अरिहन्त इन्फ्रास्ट्रक्चरका टाइल्स देशभर १ हजार पसलबाट बिक्री भइरहेको भन्दै जिप्सम बोर्ड पनि तिनै पसलमा उपलब्ध हुने बताए।

भन्सार विभागको तथ्यांकअनुसार गत आर्थिक वर्षमा १ अर्ब १८ करोड रुपैयाँको जिप्सम बोर्ड आयात भएको तथ्यांक छ। जसमध्ये सबैभन्दा बढी भारतबाट ८८ करोड र त्यसपछि चीनबाट १६ करोडको आयात गरिएको हो।

व्यवसायीले आयात गर्दा न्यून बिजकीकरण गर्ने हुँदा नेपालमा यसको आयात र कारोबारको वास्तविक मूल्य २ अर्बभन्दा बढीको रहेको अनुमान छ।

जिप्सम बोर्ड आयात गर्दा साफ्टाअन्तर्गत ७.२५ प्रतिशत महसुल, १० प्रतिशत अन्तःशुल्क र भ्याट गरी भन्सार विन्दुमा कुल ३३.३१ प्रतिशत राजस्व तिर्नुपर्छ।

त्यस्तै साफ्टाइतरको आयातमा महसुल १५ र अन्तःशुल्क १० प्रतिशत तथा भ्याट समेत गरी जम्मा ४२.९५ प्रतिशत राजस्व बुझाउनुपर्छ।

‘हामी अन्तर्राष्ट्रियस्तरको जिप्सम बोर्ड उत्पादन गर्नेछौँ र आयातितभन्दा आधा सस्तो पर्नेछ। जसले गर्दा आयात प्रतिस्थापन हुने विश्वास छ,’ लुनियाँले भने।

अरिहन्त इन्फ्राले मार्बल साइजको टाइल्स पनि उत्पादन गर्न लागेको छ। उद्योगले हाल १२ बाई १८ इन्च र २ बाई ४ फिटका टाइल्स उत्पादन गरिरहेको छ।

‘अब उत्पादन हुने टाइल्स ४ बाई ८ फिटका हुनेछन्। यी टाइल्स मार्बलको साइजका हुन् र यी उत्पादनलाई भारत र मध्यपूर्वका ओमन, कतार, दुबई, साउदी अरेबिया लगायत मुलुकमा निर्यात गर्ने तयारी भइरहेको छ,’ उनले सुनाए।

अरिहन्तले अन्तर्राष्ट्रिय क्षेत्रमा टाइल्स निर्यात गर्न फिनिसिङमा ध्यान दिनुका साथै लगानी थपेको छ। विराटनगरस्थित आइसीपीबाट अब कुनै पनि वस्तु रेल कार्गोमार्फत बन्द कन्टेनरमा निर्यात गर्न सकिने भएकाले अरिहन्तका सञ्चालकले यो सुविधा उपयोग गर्न खोजिरहेका छन्।

यसो भएमा निर्यात सामग्री सडकमार्ग प्रयोग गरेर कोलकाता बन्दरगाहसम्म पुर्‍याउनु पर्ने झन्झट हुनेछैन। रेलमार्गमार्फत हुने ढुवानीमा सडकमार्गमा जस्तो सामान फुट्ने र हराउने समस्या हुँदैन।

The post जिप्सम बोर्ड अब नेपालमा नै उत्पादन गरिंदै, ५० करोड लगानीमा अरिहन्तले खोल्यो उद्योग appeared first on BIZMANDU.