काठमाडौँ । अमेरिकी राष्ट्रपति डोनाल्ड ट्रम्पले स्पेनसँगको सबै व्यापार ठप्प पार्ने चेतावनी दिएका छन् । इरानमाथि आक्रमण गर्नका लागि अमेरिकालाई आफ्नो सैन्य आधार क्षेत्र (बेस) प्रयोग गर्न अनुमति नदिएपछि ट्रम्पले स्पेनविरुद्ध यस्तो चेतावनी दिएका हुन् ।

चेतावनी दिँदै ट्रम्पले आफू बेलायतसँग पनि खुसी नरहेको बताएका छन् । 

ओभल अफिसमा जर्मन चान्सलर फ्रेडरिक मर्जसँगको वार्ताको सुरुमा सञ्चारकर्मीहरूसँग बोल्दै ट्रम्पले आफूहरु स्पेनसँगको सबै व्यापार बन्द गर्न गइरहेको बताएका थिए । 

अमेरिकाले स्पेनसँग कुनै सम्बन्ध राख्न नचाहेको ट्रम्पले बताएका छन् । बेलायती प्रधानमन्त्री किर स्टार्मरले सोमवार संसदमा बोल्दै इरानमाथि भइरहेको अमेरिका-इजरायलको आक्रामक हमलामा बेलायत सहभागी नहुने स्पष्ट पारेका थिए । मंगलवार ओभल अफिसमा भएको भेटमा चान्सलर मर्जले ट्रम्पलाई इरानविरुद्ध जारी अमेरिका-इजरायल युद्ध जतिसक्दो चाँडो अन्त्य हुनेमा जर्मनीले आशा राखेको बताएका थिए ।

शनिवार बिहानैदेखि अमेरिका र इजरायलले इरानविरुद्ध विशाल सैन्य अभियान सुरु गरेयता ट्रम्पलाई प्रत्यक्ष भेट्ने मर्ज पहिलो विदेशी नेता हुन् ।