भेनेजुएलामा थुनामा राखिएका कम्तीमा चार जना अमेरिकी नागरिकलाई त्यहाँको अन्तरिम सरकारले रिहा गरेको छ।

निकोलस मदुरो पदच्युत भएपछि अमेरिकी बन्दीहरूलाई सार्वजनिक रूपमा रिहा गरिएको यो पहिलो घटना हो। उपराष्ट्रपति डेल्सी रोड्रिगेजको नेतृत्वमा रहेको अन्तरिम सरकारले दर्जनौँ राजनीतिक बन्दीहरूलाई रिहा गर्न सुरु गरेको सन्दर्भमा यो कदम चालिएको हो।

अमेरिकी विदेश मन्त्रालयका एक प्रवक्ताले भने, “भेनेजुएलामा थुनामा राखिएका अमेरिकीहरूको रिहाइलाई हामी स्वागत गर्छौँ। यो अन्तरिम अधिकारीहरूद्वारा सही दिशामा चालिएको एक महत्त्वपूर्ण कदम हो।”

विदेश मन्त्रालयका एक वरिष्ठ अधिकारीका अनुसार, रिहाइ प्रक्रियामा सहयोग गर्न मन्त्रालयको एउटा टोली भेनेजुएला पुगेको थियो। पछिल्ला महिनाहरूमा कम्तीमा पाँच जना अमेरिकी नागरिक भेनेजुएलामा पक्राउ परेका थिए। मदुरो सरकारले राजनीतिक दबाब सिर्जना गर्न अमेरिकी नागरिकहरूलाई बन्दी बनाउने लामो इतिहास कायम राखेको थियो।

ट्रम्प प्रशासनले भेनेजुएलामा रहेका सबै राजनीतिक बन्दीहरूलाई रिहा गर्न माग गर्दै आएको छ। प्रशासनका अनुसार अन्तरिम सरकारसँग सहकार्य गराउन अमेरिकासँग आर्थिक र सैन्य दबाब प्रयोग गर्ने क्षमता छ, र यो रिहाइ सोही मागहरूको एउटा हिस्सा हो।

गत साता भेनेजुएलाले विपक्षी राजनीतिज्ञहरूलाई रिहा गरेको थियो, जसलाई सरकारले “शान्ति खोज्ने प्रयास” का रूपमा व्याख्या गरेको छ। तर, रिहाइको गति अपेक्षाभन्दा निकै सुस्त भएको भन्दै सयौँ परिवार अझै आफ्ना प्रियजनको प्रतीक्षामा पीडित छन्।

मानवअधिकार संस्था ‘पेनल फोरम’ का अनुसार राजनीतिक कारणले स्वेच्छाचारी ढंगले थुनामा राखिएका ८०० भन्दा बढी व्यक्तिमध्ये सोमबार साँझसम्म ५६ जना मात्र रिहा भएका छन्।

अमेरिकी राष्ट्रपति डोनाल्ड ट्रम्पले भेनेजुएलाले “ठूलो स्तरमा राजनीतिक बन्दीहरू रिहा गर्ने प्रक्रिया सुरु गरिसकेको” बताएका छन्।