काठमाडौं । नेपाली कम्युनिस्ट पार्टीको एकता सन्देश सभामा नेता भीम रावलले आफ्नो अधिकांश वक्तव्य नेकपा एमाले अध्यक्ष केपी शर्मा ओलीमाथि केन्द्रित गरे।

उनले ओलीको नेतृत्वमा बनेको एमाले–माओवादी केन्द्र एकीकृत नेकपा सरकारका समयमा दुई पटक संसद विघटन भएको प्रसंग उठाउँदै, ओलीले ‘पार्टीको सपना चिस्याइदिएको’ टिप्पणी गरे।

रावलले एमाले र माओवादी विभाजनपछि आफू १०-बुँदे समझदारीमा पार्टीमा फर्किए पनि ओलीले ती सहमति कार्यान्वयन हुन नदिएको आरोप लगाए।

रावलले ओलीले अघि सारेको मिसन ८४ लाई आफूले पहिले नै ‘पतनको चौरासी’ भनेको स्मरण गर्दै आफ्नो भविष्यवाणी मिलेको दाबी गरे।

जेनजी आन्दोलनको बीचमा ‘अडिएको’ ओली अन्ततः आगोले ढोकाझ्याल छुनासाथ हेलिकप्टर चढेर भागेको उनको आरोप थियो। देशको प्रधानमन्त्रीलाई ‘देशको नायक, कमाण्डर’को रूपमा उल्लेख गर्दै रावलले प्रश्न गरे, ‘ओलीले देश जोगाए ?’

एमालेमा आफ्ना प्रियजन रहेको भन्दै रावलले खरानी घस्दै बस्ने पार्टीमा नबस्न आग्रह गरे र सबैलाई नेपाली कम्युनिस्ट आन्दोलनको यात्रामा समाहित हुन आह्वान गरे।

धनगढी र पोखराका सभामा ठूलो भीड देखेपछि भने रावलले अनौपचारिक रूपमा ‘नेकपा’ छुटाएर ‘एमाले’ शब्द प्रयोग गरे। ओलीकै आलोचना बीच उनले भने ‘आउँदो निर्वाचनमा एमालेको बहुमतलाई कसैले रोक्न सक्दैन।’

यो भनाइ सुनेपछि कार्यकर्ताबीच ठट्टा र हाँसो गुञ्जियो। तुरुन्तै आफू सच्याउँदै उनले थपे ‘नेपाली कम्युनिस्ट पार्टीको यात्रालाई कसैले रोक्न सक्दैन।’