भजनी। टीकापुर नगरपालिका–८ का पुनिराम थारू पाँच वर्षदेखि कर्णाली नदी किनारमा बगरखेती गर्दै आएका छन्। सिँचाइ सहज र उत्पादन राम्रो हुने भएकाले उनी नदी किनार र टापुको जमीन प्रयोग गर्दै खेती गर्दै आएका हुन्।

थारूले प्याजखेतीलाई प्राथमिकता दिएका छन्। बर्सेनि १०–१२ क्विन्टल प्याज टापुबाट उत्पादन गरिन्छ। प्याजसँगै धनिया, मकै, बन्दागोभी, टमाटर पनि उत्पादन गरिन्छ। थारूका अनुसार बालुवामा प्याज राम्रो हुन्छ र सिँचाइको सहजताले उत्पादन बढ्छ।

टीकापुर–बर्दियाको सत्ती पुल आसपास क्षेत्रमा अहिले हरियाली छ। बालुवा भएको क्षेत्रमा साना प्लट बनाइएका छन्, जहाँ लहरै प्याज रोपिएका छन्। वडा नं ८ फाँटागाउँका ५०–६० घरपरिवारले नदी किनार र टापुमा प्याजखेती गर्दै आएका छन्। बर्सेनि बगरबाट करिब ७०० क्विन्टल प्याज उत्पादन हुन्छ।

टीकापुर नगरपालिका–८ बटनपुरकी सम्पुर्नी चौधरीले पहिलोपटक नदीको टापुमा पाँच केजी प्याज रोपेका हुन्। उनले उत्पादन अपेक्षा भन्दा राम्रो भएको बताइन्। बटनपुरकै पहारी चौधरीले पनि पहिलोपटक बगरमा प्याजखेती सुरु गरेका छन्। आफूलाई घरमा प्रयोग हुने मात्र प्याज उत्पादन गरेकाले बिक्री नगर्ने योजना बनाएका छन्।

विगतदेखि बगरमा खेती गर्दै आएका किसानले व्यावसायिक रूपमा उत्पादन बढाएका छन्। खेतीबाट आम्दानी भएपछि किसानहरूले बगरको उपयोग विस्तार गर्दै आएका छन्।

बगरबाट आम्दानी हुन थालेपछि त्यहाँका नागरिकहरू उत्साहित छन्। सामान्य मलखाद र कम मेहनतले उत्पादन राम्रो हुने भएकाले किसानले वर्षात्को चिन्ता कम अनुभव गरेका छन्।