एसीसी यू-१९ प्रिमियर कप : उपाधिका लागि नेपाल र यूएईबीच प्रतिस्पर्धा
काठमाडौँ। संयुक्त अरब इमिरेट्स (यूएई) मा जारी एसिसी पुरुष यू-१९ प्रिमियर कप क्रिकेटको उपाधिका लागि नेपाल र आयोजक यूएईबीच प्रतिस्पर्धा हुने भएको छ। उपाधिका लागि सोमबार बिहान साढे १० बजे अजमानस्थित करवान मैदानमा खेल हुनेछ।
नेपालले मलेसियालाई नौ विकेटले हराएर उपाधिनजिक पुगेको हो। यूएईले भने ओमानलाई आठ विकेटले पराजित गर्दै फाइनलमा स्थान सुरक्षित गरेको हो। नेपाल र यूएई एसिया कप खेल्नका लागि भने छनोट भइसकेका छन्। प्रतियोगिताको फाइनलमा पुग्ने दुवै टोली सिधै एसिया कपमा छनोट हुने प्रावधान छ।
सेमिफाइनलमा पराजित हुने टोलीबीच तेस्रो स्थानका लागि खेल हुने र तेस्रो स्थान हासिल गर्ने टोली पनि एसिया कपमा पुग्नेछ। तेस्रो स्थानका लागि सोमबार मलेसिया र ओमान खेल्नेछन्। प्रतियोगितामा १४ टोलीको सहभागिता थियो। यू-१९ एसिया कप आगामी डिसेम्बरमा यूएईमा हुँदै छ।