काठमाडौं। नेपाली कांग्रेसका २७ जिल्लाका सभापति महामन्त्री गगन थापा र विश्वप्रकाश शर्माको पक्षमा देखिएका छन्।

लुम्बिनी प्रदेशका सभापति अमरसिंह पुनसहित २७ जिल्ला सभापति विशेष महाधिवेशन गर्नुपर्ने पक्षमा उभिएका छन्। उनीहरुले आइतबार साँझ प्रेस विज्ञप्ति जारी गर्दै विशेष महाधिवेशनबाहेक निर्णय स्वीकार्य नहुने चेतावनी दिएका छन्।

संस्थापन पक्षले फागुन २१ को निर्वाचनपछिमात्र महाधिवेशन गर्ने गरी कार्यतालिका ल्याउने तयारी गरिरहँदा नवलपुरका सभापति महेन्द्रध्वज जिसी, बैतडीका सभापति चतुरबहादुर चन्द, अर्घाखाँचीका सभापति केशव श्रेष्ठ, धनकुटाका सभापति दिनेश राई, तेह्रथुमका सभापति अर्जन तुम्बाहाम्फे लगायत विशेष महाधिवेशन गर्नुपर्ने पक्षमा उभिएका हुन्।

सुनसरीका सभापति केदार भण्डारी, उदयपुरका सभापति हिमाल कार्की, सप्तरीका सभापति रामदेव साह, रसुवाका सभापति पेम्बाछिरिङ तामाङ, काठमाडौंका सभापति कृष्ण बानियाँ सबुज, ललितपुरका सभापति जीतेन्द्र श्रेष्ठ, काभ्रेका सभापति तीर्थ लामा, सिन्धुपाल्चोकका सभापति जंगबहादुर लामा, दार्चुलाका सभापति ललितसिंह बोहरा, गोरखाका सभापति नन्दप्रसाद न्यौपानेले पनि निर्वाचन अगाडि विशेष महाधिवशेन गरेर पार्टीको नेतृत्व फेर्नुपर्ने बताएका छन्।

त्यसैगरी कास्कीका किशोरदत्त बराल, पर्वतका युवराज जोशी, गुल्मीका खिलध्वज पन्थी, पाल्पाका हिमालदत्त श्रेष्ठ, नवलपरासीका अर्जुन पोखरेल, कपिलवस्तुका अब्दुल कलाम, रुकुमपूर्वका केशरमान रोका, रोल्पाका किशोर आचार्य, प्युठानका विष्णु गिरी, बाँकेका नारायण गाैडेल र सल्यानका सभापति केशरबहादुर विष्टले पनि विज्ञप्तिमा हस्ताक्षर गरेका छन्।

महामन्त्रीद्वय गगन र विश्वप्रकाश निर्वाचनअघि नै नेतृत्व फेर्नुपर्ने अडानमा छन्। ५४ प्रतिशत महाधिवेशन प्रतिनिधिले विशेष महाधिवेशन माग गर्दै असोज २८ मै हस्ताक्षर कार्यबहाक सभापति पूर्णबहादुर खड्कालाई बुझाएका थिए।

कांग्रेस सभापति शेरबहादुर देउवाले भने आइतबार बिहान संस्थापन पक्षकै नेताहरुसँग हस्ताक्षर फिर्ता भए पुस मसान्तभित्र नियमित महाधिवेशन बोलाउने संकेत गरेका छन्।

The post कांग्रेसका २७ जिल्ला सभापति गगन-विश्वको पक्षमा उभिए, ‘विशेष महाधिवेशनबाहेक अरु स्वीकार्दैनौं’ appeared first on BIZMANDU.