संयुक्त अरब इमिरेट्स (युएई)मा भएको इरानी आक्रमणमा परी एक नेपाली नागरिकसहित तीन जनाको मृत्यु भएको छ । युएईको रक्षा मन्त्रालयका अनुसार फेब्रुअरी २८ (शनिबार) देखि सुरु भएको आक्रमणका विभिन्न घटनामा परेर एक नेपालीसहित एक पाकिस्तानी र एक बङ्गलादेशी नागरिकले ज्यान गुमाएका हुन्।

मन्त्रालयले जनाएअनुसार आक्रमणको क्रममा प्रक्षेपित केही ड्रोनहरू सर्वसाधारण लक्षित क्षेत्रमा खसेपछि मानवीय क्षति भएको हो। घटनापछि आपत्कालीन उद्धार टोलीहरू तुरुन्तै परिचालन गरिएको थियो भने घाइतेहरूलाई नजिकका अस्पतालहरूमा उपचारका लागि लगिएको थियो।

अधिकारीहरूका अनुसार कुल ५८ जना विभिन्न राष्ट्रियताका व्यक्तिहरू सामान्य रूपमा घाइते भएका छन्। घाइतेहरूमा इमिरातीसहित इजिप्टियन, इथियोपियन, फिलिपिनो, पाकिस्तानी, इरानी, भारतीय, बङ्गलादेशी, श्रीलङ्काली, अजरबैजानी, येमेनी, युगान्डाली, इरिट्रियन, लेबनानी र अफगानी मूलका नागरिकहरू रहेका छन्।

आक्रमणको जिम्मेवारी इरानबाट प्रक्षेपित मिसाइल र ड्रोनहरूसँग जोडिएको बताइएको छ। युएई सरकारले मृतकप्रति गहिरो दुःख व्यक्त गर्दै पीडित परिवारप्रति समवेदना प्रकट गरेको छ। साथै, सुरक्षा अवस्था कडाइका साथ निगरानीमा राखिएको र नागरिकलाई सतर्क रहन अनुरोध गरिएको छ।

यसैबीच, रक्षा मन्त्रालयले इरानको आक्रमण प्रयासलाई आफ्नो वायुसेना तथा वायु प्रतिरक्षा प्रणालीले प्रभावकारी रूपमा निष्क्रिय पारेको जनाएको छ। मन्त्रालयका अनुसार आक्रमण सुरु भएयता १६५ वटा ब्यालेस्टिक मिसाइल, दुई वटा क्रुज मिसाइल र ५४१ वटा ड्रोन प्रक्षेपण गरिएकोमा अधिकांशलाई अवरोध गरी नष्ट गरिएको छ।

मन्त्रालयले जारी गरेको विवरणअनुसार, दोस्रो दिन बिहान मात्रै सशस्त्र बलले २० वटा ब्यालेस्टिक मिसाइल ध्वस्त पारेको थियो भने आठ वटा मिसाइल समुद्रमा खसेका थिए। सोही अवधिमा दुई वटा क्रुज मिसाइल र ३११ वटा ड्रोन नष्ट गरिएको थियो। यद्यपि २१ वटा ड्रोनले सर्वसाधारण लक्षित संरचनामा प्रहार गर्दा भौतिक क्षति भएको जनाइएको छ।

अहिलेसम्म पत्ता लागेका १६५ ब्यालेस्टिक मिसाइलमध्ये १५२ वटा सफलतापूर्वक अवरोध गरी नष्ट गरिएका छन् भने १३ वटा समुद्रमा खसेका छन्। दुई वटै क्रुज मिसाइललाई पनि अवरोध गरिएको मन्त्रालयले स्पष्ट पारेको छ। त्यस्तै ५४१ इरानी ड्रोन ट्र्याक गरिएकोमा ५०६ वटा खसालिएका छन् भने ३५ वटा ड्रोन देशभित्र अवतरण हुँदा भौतिक क्षति पुगेको बताइएको छ।