इजरायल र अमेरिकाको इरानसँगको युद्धलाई एसियाका लगानीकर्ताले नजिकबाट नियालिरहेका छन्। त्यसको असर एसियाली सेयर बजारमा देखिएको छ।

बुधबार लगातार तेस्रो दिन एसियाको सेयर बजार घटेको छ। तेलको मूल्य भने हल्का बढेको छ।

दक्षिण कोरियाको कोस्पी सूचक प्रारम्भिक कारोबारमै ६ प्रतिशतले घटेको छ। जापानको निक्केई २२५ सूचक ३ प्रतिशतभन्दा बढीले तल झरेको छ।

अस्ट्रेलियाको एएसएक्स २०० सूचक १.८ प्रतिशतले घटेको छ। कारोबार पनि अस्थिर देखिएको छ।

ब्रेन्ट कच्चा तेलको मूल्य एसियामा करिब १.५ प्रतिशतले बढेको छ। यसअघि २ दिन लगातार तीव्र वृद्धि भएको थियो।

मध्यपूर्वको द्वन्द्वले वित्तीय बजारलाई हल्लाएको छ। हर्मुजको साँघुरो जलमार्ग नजिक पानीजहाजमाथि आक्रमण भएपछि विश्वभर ऊर्जाको मूल्य यस साता तीव्र बढेका छन्।

विश्वको करिब २० प्रतिशत तेल र ग्यास इरान र संयुक्त अरब इमिरेट्स (यूएई)बीचको यो साँघुरो मार्गबाट आउँछ।

इरानले पानीजहाजहरूलाई आगो लगाइदिने चेतावनी दिएपछि त्यहाँको आवागमन लगभग पूर्ण रूपमा रोकिएको छ। हर्मुजको साँघुरो जलमार्गबाट यातायात झन्डै ठप्प भएको छ।

मंगलबार अमेरिकी राष्ट्रपति डोनाल्ड ट्रम्पले आवश्यक परे अमेरिकी जलसेनाले त्यहाँ पानीजहाजको सुरक्षा गर्ने बताएका छन्। युद्धका कारण ऊर्जा आपूर्ति संकट रोक्न यस्तो कदम चालिने उनको भनाइ छ।

उनले त्यस क्षेत्रका सबै ढुवानी कम्पनीलाई उचित मूल्यमा जोखिम बीमा उपलब्ध गराइने बताएका छन्। विश्वमा ऊर्जा आपूर्ति निर्बाध राख्न यस्तो व्यवस्था गरिने उनले उल्लेख गरेका छन्।

शनिबारदेखि अमेरिका र इजरायलले इरानमाथि आक्रमण गरेपछि सेयर बजार तीव्र घटेको हो। तेहरानले खाडीभर प्रहार गर्दै अमेरिका र इजरायलको जवाफ जवाफ दिएको छ। त्यसले ढुवानी र व्यावसायिक उडानमा ठूलो अवरोध सिर्जना गरेको छ।

दक्षिण कोरिया र जापानजस्ता निर्यातमा निर्भर देशका सेयर बजार बढी दबाबमा परेका छन्। ढुवानी जोखिममा पर्दा यस्ता अर्थतन्त्र भू-राजनीतिक झट्काबाट चाँडै प्रभावित हुन्छन्। युद्ध लम्बिएमा बजारमा थप अस्थिरता देखिन सक्ने चिन्ता व्यक्त गरिएको छ।

The post इरान युद्धपछि एसियाली सेयर बजार तेस्रो दिन पनि ओरालो, उकालो लाग्दै तेलको मूल्य appeared first on BIZMANDU.