काठमाडौँ । निर्वाचनको मौन अवधिमा सामाजिक सञ्जालमा फैलाइएका अपुष्ट तथा भ्रामक सामग्रीप्रति गगन थापाले आपत्ति जनाएका छन्।

आफू र पार्टीका उम्मेदवारलाई लक्षित गरी असत्य सूचना तथा सम्पादन गरिएका भिडियो सामग्री योजनाबद्ध रूपमा फैलाइएको उनले बताएका छन्। यस्तो गतिविधि निर्वाचन आचारसंहिताविरुद्ध र लोकतान्त्रिक अभ्यासमा प्रतिकूल प्रभाव पार्ने उनको भनाइ छ।

थापाले फेसबुक, टिकटक र युट्युबजस्ता प्लेटफर्ममा देखिएका शंकास्पद सामग्री तथ्य परीक्षणपछि मात्र साझा गर्न र गलत सामग्री सम्बन्धित माध्यममै रिपोर्ट गर्न आग्रह गरेका छन्। लोकतान्त्रिक प्रक्रियालाई सुदृढ बनाउन जिम्मेवार डिजिटल सहभागिता आवश्यक रहेको उनले उल्लेख गरेका छन्।