काठमाडौँ । सरकारले कृषि क्षेत्रको तथ्याङ्क सङ्कलनमा नयाँ आयाम थप्दै देशव्यापी कृषि सर्वेक्षण सुरू गरेको छ।

कृषि तथा पशुपन्छी विकास मन्त्रालयले स्थानीय तह र प्रदेश सरकारसँग समन्वय गरेर कृषकको अनुभव र उत्पादनसँग सम्बन्धित विस्तृत तथ्याङ्क सङ्कलन गरिरहेको छ।

मन्त्रालयका तथ्याङ्क शाखा प्रमुख रामकृष्ण रेग्मीका अनुसार सर्वेक्षणमा किसानको उत्पादन, उपजको मूल्य, बजार अवस्था, कृषि ऋण, अनुदान, आधुनिकीकरण र विषादी प्रयोग लगायतका विषयमा प्राथमिकता दिइएको छ।

सर्वेक्षणका लागि जनशक्ति परिचालनमा किसानको सङ्ख्या बढी भएका क्षेत्रमा बढी जनशक्ति परिचालित गरिँदैछ भने अन्य क्षेत्रहरूमा पनि आवश्यकतानुसार जनशक्ति परिचालन हुने उनले बताए। रेग्मीले भने, “यस पहलले लगभग आठ महिनाभित्र तथ्याङ्क सङ्कलन प्रक्रिया पूरा हुने देखिएको छ।”

गणकहरूले प्रत्यक्ष किसानसँग भेटेर नमूना विधिमार्फत तथ्याङ्क सङ्कलन गरिरहेका छन्। पहिलो चरणमा छ लाख किसानको नमूना लिइएको छ भने तीमध्ये ५१ हजार किसानको अनुभव, सरकारद्वारा प्रदान गरिएका सेवा तथा सहुलियतमा पहुँच र समस्याहरू पहिचान गरी आधिकारिक तथ्याङ्क तयार गरिनेछ।

सर्वेक्षणबाट सङ्कलित तथ्याङ्क राष्ट्रियस्तरमा अध्ययन गरी नीति निर्माण र योजना तयारीमा प्रयोग गरिनेछ। मन्त्रालयले स्थानीय तहको क्षमता अभिवृद्धि गर्न तालिम र आवश्यक प्रशिक्षण कार्यक्रम समेत सञ्चालन गरेको छ।