काठमाडाैँ । प्रहरीले ७४ लाख ५२ हजार ६९९ रुपैयाँ बराबरको अभौतिक मुद्रा (क्रिप्टोकरेन्सी) कारोबारमा संलग्न दुई जनालाई पक्राउ गरेको छ।

भद्रकालीस्थित जिल्ला प्रहरी परिसर काठमाडौँका अनुसार मंसिर १३ गते दिउँसो करिब २ बजे काठमाडौँ महानगरपालिका–१०, बिजुली बजार क्षेत्रमा केही व्यक्तिहरू क्रिप्टोकरेन्सीको अवैध कारोबारमा संलग्न रहेको सूचना प्राप्त भएको थियो।

प्राप्त सूचनापछि खटिएको टोलीले काठमाडौँ महानगरपालिका–१४ स्थायी घर भई हाल कलंकी बसोबास गर्ने ४५ वर्षीय उमेश श्रेष्ठ र वर्ष ३६ का विशाल डंगोललाई नियन्त्रणमा लिएको जिल्ला प्रहरी परिसर काठमाडौँले जनाएकाे छ । उनीहरूको प्रयोगमा रहेका पाँचवटा मोबाइल फोन समेत प्रहरीले कब्जा गरेको छ।

हाल उनीहरूमाथि क्रिप्टोकरेन्सीको अवैध प्रयोगसम्बन्धी थप अनुसन्धान जारी रहेको प्रहरीले जनाएको छ।