काठमाडौं । ११औँ महाधिवेशन नजिकिएसँगै नेकपा (एमाले)को आन्तरिक राजनीतिको सरगर्मी बढेको छ । अध्यक्ष पदमा पुनः तेस्रो पटक दोहोरिने केपी शर्मा ओलीको चाहनालाई ईश्वर पोखरेलले चुनौती दिने तयारी गरेका छन् । ९औँ र १०औँ महाधिवेशनबाट अध्यक्षमा निर्वाचित ओलीलाई आसन्न ११औँ महाधिवेशनबाट बिदा गरेर पार्टीको नेतृत्वमा पुग्ने लक्ष्यसहित वर्तमान वरिष्ठ उपाध्यक्ष ईश्वर पोखरेलले उम्मेद्‌वारी घोषणा गरिसकेका छन् ।

पोखरेलको उम्मेदवारी घोषणासँगै राजनीतिक वृत्तमा ‘अब ओलीले पोखरेललाई भीम रावल बनाउँछन्’ भन्ने शब्द प्रयोग गरेर टिप्पणी भइरहेका छन् । २०७८ मा चितवनमा भएको एमालेको १०औँ महाधिवेशनमा ओलीविरुद्ध अध्यक्षमा भीम रावल प्रतिस्पर्धामा थिए । हाल उनी एमालेमा छैनन्, अर्थात् केहीले ‘ओलीसँग अध्यक्षमा प्रतिस्पर्धा गरेकै कारण उनले एमाले छाड्नुपरेको’ टिप्पणी गर्छन् ।

आसन्न ११औँ महाधिवेशनमा ओलीसँग अध्यक्षमा प्रतिस्पर्धा गरे ‘पोखरेल अर्को भीम रावल बन्ने’ भन्ने टिप्पणी भइरहेको छ ।

के ओलीसँग लोकतान्त्रिक विधि र प्रक्रियामार्फत् अध्यक्षमा प्रतिस्पर्धा गर्न पाइँदैन ? अध्यक्ष ओली भन्छन्, ‘पाइन्छ ।’ उनले प्रतिस्पर्धा गर्ने छुट सबैलाई भएको बताएका छन् ।

आइतबार च्यासलस्थित पार्टी केन्द्रीय कार्यालयमा आयोजित कार्यक्रममा अध्यक्ष ओलीले महाधिवेशनमा प्रतिस्पर्धा गर्न खुला भएको बताएका हुन् । ‘प्रतिस्पर्धा गर्न चाहनेले प्रतिस्पर्धा राम्रोसँग गर्न पाउँछ । त्यसका लागि ठाउँ हुन्छ,’ ओलीले भने ।

उनले प्रतिस्पर्धाका लागि कसैलाई पनि नरोकिने बताए । ‘मतदान गर्न नदिएर, मतदान नै नभएर सर्वसम्मतीले गर्नुपर्छ भन्ने नाउँमा कसैलाई अघि बढ्नैन नदिएर रोक्ने खालको काम हुँदैन । रोक्ने सोक्ने कुनै कुरै होइन,’ ओलीले भने।

यद्यपि, अध्यक्ष ओली नेतृत्वको लागि सकभर सहमतिमै टुंग्याउने प्रयास गरिने बताए । ‘अध्यक्षका हैसियतले मेरो के आग्रह हुन्छ भने जसले छाड्नुपर्छ सहमतिका साथले नै गरौँ, जो बस्नुपर्छ सहमतिका साथ बसौं,’ उनले भने ।