एजेन्सी । वरिष्ठ कन्नड कलाकार ‘मैसुरू’ श्रीकान्तय उमेशको ८० वर्षको उमेरमा निधन भएको छ।

लामो समयदेखि क्यान्सरसँग संघर्ष गरिरहेका उमेशले भारतको बेंगलुरूस्थित एक अस्पतालमा उपचाररतै आइतबार अन्तिम सास लिए।

सन् १९४५ अप्रिल २४ मा मैसुरूमा जन्मिएका उमेशले ४ वर्षको उमेरमै रंगमञ्चबाट अभिनय यात्रा थालनी गरेका थिए। अभिनयप्रति उनको समर्पण यति गहिरो थियो कि पाँच दशकको लामो यात्रामा उनले ३५० भन्दा बढी कन्नड फिल्महरूमा आफ्नो छाप छोडे।

सन् १९६० मा ‘मक्काला राज्य’ मार्फत मुख्य भूमिकामा पर्दामा देखापरेका उनी केही समयको अभिनय विश्रामपछि १९७७ को चर्चित फिल्म ‘कथा संगमा’ले पुनः ठूलो लोकप्रियता हासिल गर्न सफल भएका थिए।

उनले अभिनय गरेका ‘नागर होले’, ‘गुरू शिष्यरू’, ‘वेंकटा इन संकटा’ लगायतका फिल्महरू कन्नड फिल्म उद्योगका चर्चित कृतिहरूका रूपमा आजसम्म सम्झना गरिन्छ।

उमेशको निधनले कन्नड फिल्म क्षेत्रले आफ्नो एक सहज, अनुभवी र समर्पित कलाकार गुमाएको छ।