कर्णालीलाई हराएर काठमाडौं प्लेअफ नजिक, इरास्मस र सिम्पसनको साझेदारीमा सहज जित
काठमाडौं। कर्णाली याक्सलाई हराउँदै काठमाडौं गोर्खाज प्लेअफको नजिक पुगेको छ। नेपाल प्रिमियर लिग (एनपीएल) अन्तर्गत आइतबार सम्पन्न खेलमा कर्णालीमाथि ५ विकेटको जित निकालेको काठमाडौ प्लेअफको नजिक पुगेको हो।

कीर्तिपुरस्थित टीयू क्रिकेट मैदानमा टस जितेर ब्याटिङमा उत्रिएको कर्णालीले निर्धारित २० ओभरमा ७ विकेट गुमाउँदै १४९ रन बनाएको थियो। जवाफी ब्याटिङमा उत्रिएको काठमाडौंले २ ओभर बाँकी छँदै ५ विकेट गुमाएर लक्ष्य भेट्टायो।
काठमाडौंका लागि आक्रामक ओपनिङ गरेका बेन चार्ल्सवर्थले २१ बलमा २ चौका र ३ छक्काको सहायतामा ३४ रन बनाउँदै राम्रो सुरुवात दिलाएका थिए।

अर्का ओपनर आकाश त्रिपाठी भने ८ रन बनाएर नन्दन यादवको बलमा रनआउट हुँदा मिलिन्द कुमार १५ रन बनाएर रनआउट भएका थिए। काठमाडौंको जितमा मध्यक्रमका गेहर्राड इरास्मस र जोन सिम्पसनको साझेदारी निर्णायक बन्यो। यी दुईले ४४ बलमा ८६ रनको साझेदारी गरे।
बलिङतर्फ कर्णालीका नन्दन यादवले ३ तथा पवन सर्राफले १ विकेट लिए पनि काठमाडौंलाई रोक्न सकेनन्।
कर्णालीको इनिङ्स
त्यसअघि टस जितेर ब्याटिङमा उत्रिएको कर्णालीले निर्धारित २० ओभरमा ७ विकेट गुमाएर १४९ रन बनाएको थियो। कर्णालीको ब्याटिङ उकास्न महत्वपूर्ण योगदान योगदान गरेका गुल्सन झा अर्धशतक बनाउन एक रनले चुके।
टस जितेर ब्याटिङमा उत्रिएको कर्णालीको सुरुवात राम्रो हुन सकेन। काठमाडौंका कप्तान करण केसीले कर्णालीका प्रभावशाली ओपनर प्रियांक पाञ्चाललाई रोयल डकआउट गर्दै पहिलो सफलता हात पारे।
अर्का ओपनर मार्क वाटले २७ बलमा १ चौका र २ छक्काको सहायतामा ३० रन बनाउँदा तेस्रो नम्बरमा आएका अस्ट्रेलियन ब्याटर विल बोसिस्ट १ रन बनाएर रन आउट भए।

पवन सर्राफ र मार्क वाटले ४६ बलमा ५९ रन बनाउँदै इनिङ्स उकास्ने प्रयास गरे। सर्राफले २९ बलमा समान २ चौका र छक्काको सहायतामा ३५ रन बनाए। उनलाई सन्तोष यादवले एलबीडब्लु आउट गरे।
त्यस्तै नजिबुल्ला जार्दनले १२, कप्तान सोमपाल कामीले ६ तथा दीपक डुम्रेले १० रन बनाउँदा कर्णालीका लागि सबैभन्दा ठूलो योगदान गुल्सन झाले गरे। झाले २२ बलमा ६ चौका र ३ छक्का प्रहार गर्दै अविजित ४९ रन बनाए।


बलिङतर्फ कर्णालीका राशिद खानले २ विकेट लिँदा करण केसी, मिलिन्द कुमार र सन्तोष यादवले समान १ विकेट लिए।
यो जितले ६ खेलबाट ८ अंक बनाएको काठमाडौं शीर्ष तीनमा बलियो भएको छ। काठमाडौंले अब पोखरा एभेन्जर्ससँग खेल्न बाँकी छ। अर्कोतर्फ कर्णालीको प्लेअफ पुग्ने सम्भावना असाध्यै कमजोर बनेको छ। अब उसले बाँकीका खेल जितेर पनि समीकरण पर्खनुपर्ने हुन्छ। पाँच खेल खेल्दा एउटामात्र जित निकालेको कर्णालीले अब पोखरा र जनकपुरसँग खेल्न बाँकी छ।
The post कर्णालीलाई हराएर काठमाडौं प्लेअफ नजिक, इरास्मस र सिम्पसनको साझेदारीमा सहज जित appeared first on BIZMANDU.