काठमाडौँ। राहदानी विभाग त्रिपुरेश्वरको मूल गेटबाहिरबाट तीन बिचौलिया पक्राउ परेका छन्।

पक्राउ पर्नेमा काठमाडौँ महानगरपालिका १८ का ४५ वर्षीय मनराज श्रेष्ठ, बझाङ घर भई काठमाडौं कीर्तिपुर नगरपालिका ५ बस्ने १९ वर्षीय हेमन्तसिंह ओखेडा र प्युठान घर भई ललितपुर महालक्ष्मी नगरपालिका ४ बस्ने ३० वर्षीय दिपेश केएम छन्।

तीनै जनालाई काठमाडौं उपत्यका अपराध अनुसन्धान कार्यालयको टोलीले शुक्रबार पक्राउ गरेको हो। सेवाग्राहीलाई छिटो-छरितो राहदानी बनाइदिने प्रलोभनमा अतिरिक्त रकम लिएर हैरान पारेको आरोपमा उनीहरूलाई पक्राउ गरिएको प्रहरी उपरीक्षक काजीकुमार आचार्यले बताए।

पक्राउ परेकाहरूलाई थप अनुसन्धानका लागि वृत्त कालीमाटी काठमाडौँमा पठाइएको छ। यसअघि प्रहरीले विभागबाट ११ जना बिचौलिया पक्राउ गरेको थियो।