म्याड्रिड। स्पेनले आफ्नो भूमिमा रहेका सैन्य अड्डाहरू इरानविरुद्धको आक्रमणका लागि प्रयोग गर्न अमेरिकालाई अनुमति दिन इन्कार गरेको छ।

स्पेन सरकारले ‘रोटा’ र ‘मोरोन’ मा रहेका आफ्ना संयुक्त सैन्य अड्डाहरू इरानविरुद्धको जारी हमलामा प्रयोग गर्न नदिने निर्णय गरेपछि अमेरिकालाई सामरिक धक्का लागेको छ।

स्पेनको समाजवादी सरकारले अमेरिका र इजरायलद्वारा इरानमाथि भइरहेको सैन्य कारबाहीलाई “अन्यायपूर्ण र खतरनाक” भन्दै यसको निन्दा समेत गरेको छ।

स्पेनका प्रधानमन्त्री पेड्रो सान्चेजले अमेरिका र इजरायलको सैन्य कदमलाई एकपक्षीय भन्दै विरोध गरे। उनले यस्ता गतिविधिले अन्तर्राष्ट्रिय व्यवस्थालाई थप शत्रुतापूर्ण र अनिश्चित बनाउने चेतावनी दिएका छन्।

स्पेनका विदेश मन्त्री जोसे मानुएल अल्बारेसले सोमबार सञ्चारमाध्यमहरूसँग कुरा गर्दै स्पेन इरानी जनताको लोकतन्त्र, स्वतन्त्रता र मौलिक अधिकारको पक्षमा रहेपनि कुनै हालतमा युद्धका लागि आफ्नो भूमि प्रयोग गर्न नदिने प्रष्ट पारे।

मन्त्री अल्बारेसले भने, “हाम्रा अड्डाहरू अमेरिकासँगको सम्झौता र संयुक्त राष्ट्र संघको बडापत्रले तोकेको दायराभन्दा बाहिरका कुनै पनि कार्यका लागि प्रयोग भएका छैनन् र हुने पनि छैनन्।”

स्पेनको यो कडा अडानले युरोप र उत्तर अमेरिकी देशहरूको सैन्य गठबन्धन ‘नेटो’ सम्बद्ध राष्ट्रहरूबीच इरान मामिलालाई लिएर मतभेद रहेको उजागर गरेको छ। म्याड्रिडले सैन्य हस्तक्षेपको सट्टा कूटनीतिक समाधान खोजिनुपर्नेमा जोड दिँदै आएको छ।