काठमाडौं। राष्ट्रिय स्वतन्त्र पार्टी (रास्वपा) र विवेकशील साझा पार्टीबीच एकता भएको छ। दुई पार्टीले पाँच बुँदे सहमतिसहित एकता गरेका हुन्।

आइतबार काठमाडौंमा एक समारोहबीच एकता घोषणा गरिएको छ।

सहमतिपत्रमा रास्वपाका तर्फबाट कार्यबाहक सभापति डोलप्रसाद अर्याल र उपसभापति डा. स्वर्णिम वाग्ले तथा विवेकशील साझाका तर्फबाट अध्यक्ष समीक्षा बाँस्कोटा र उपाध्यक्ष प्रकाशचन्द्र परियारले हस्ताक्षर गरे।

सहमति अनुसार विवेकशील साझाका नेताहरुलाई रास्वपाको संघीय नेतृत्व मञ्चमा मनोनीत गरिने भएको छ।

वैकल्पिक राजनीतिको प्रवर्द्धनमा स्व. उज्वल थापा एवं ‘विवेकशील अभियान’को योगदानलाई दस्तावेजीकरण गरी मान्यता दिने सहमति भएको छ ।

‘महाधिवेशनसम्मका लागि बनाइएको विशेष संयन्त्र संघीय नेतृत्व मञ्चमा विवेकशील साझा पार्टीबाट एकीकरणको प्रक्रियाबाट आउने नेताहरुलाई आपसी समझदारीमा मनोनयन गर्ने, मञ्चका सदस्यहरूको वरीयता केन्द्रीय समितिको सदस्य सरह हुने, विवेकशील साझा पार्टीका सदस्य र सल्लाहकारहरुलाई केन्द्रीय, प्रादेशिक र स्थानीय तहगत संरचनामा समुचित समायोजन गरी जिम्मेवारी तोक्दा योग्यता, समावेशिताको सिद्धान्त र सार्वजनिक छविलाई आधार मान्ने,’ सहमतिपत्रमा भनिएको छ।

The post रास्वपा र विवेकशील साझा पाँच बुँदे सहमति गरेर मिले, साझाका नेतालाई मञ्चमा मनोनीत गरिने appeared first on BIZMANDU.