काठमाडौं। नेपाल राष्ट्र बैंकको निर्देशनपछि प्रभु बैंकको आकस्मिक सञ्चालक समिति बैठक बसेर वरिष्ठतम कर्मचारी निरज लम्साललाई निमित्त प्रमुख नियुक्त गर्ने निर्णय गरेको छ।

लम्साल प्रभु बैंकमा प्रमुख रिकभरी अधिकृत छन्। राष्ट्र बैंकले निमित्त प्रमुख नियुक्त गर्ने निर्देशन दिएपछि सञ्चालक समितिले निर्णय गरेको हो।

कर्जा लगानीलाई आधार बनाउँदै प्रहरीको केन्द्रीय अनुसन्धान ब्यूरो (सीआइबी) ले आइतबार दिउँसो प्रमुख कार्यकारी अधिकृत अशोक शेरचन, डेपुटी प्रमुख कार्यकारी अधिकृत मणिराम शर्मा र प्रमुख जोखिम अधिकृत रिवाज श्रेष्ठलाई अनुसन्धानका लागि पक्राउ गरेको छ।

साढे तीन खर्ब रुपैयाँ हाराहारी निक्षेप रहेको बैंकबाट सीआइबीले माथिल्ला अधिकारी पक्राउ गरेपछि बैंक व्यवस्थापनमा अन्योल छ।

आइतबार साँझ डेपुटी गभर्नर बमबहादुर मिश्रको निर्देशनमा प्रभु बैंकको आकस्मिक सञ्चालक समिति बैठक बसेको हो।बैठकले वरिष्ठतम कर्मचारीलाई निमित्तको जिम्मेवारी दिने निर्णय गरेको हो।

यही विषयलाई लिएर नेपाल राष्ट्र बैंकको नियमन, सुपरिवेक्षणलगायतका विभागको संयुक्त बैठक बसेको थियो। प्रमुख कार्यकारी अधिकृतसहित वरिष्ठतम कर्मचारी पक्राउपछि राष्ट्र बैंकले के गर्ने भन्ने छलफल चलेको थियो।

बैठकमा निक्षेप बाहिरिएर बैंकसहित प्रणालीगत जोखिम हुने हो कि भनेर छलफल भएको थियो। तर, कुनै औपचारिक निर्णय गरेर अगाडि बढ्ने विषयमा भने एकमत हुन सकेन।

‘कसरी अगाडि बढ्ने भनेर भोलि अन्डिस्ट्यानिङ बनाउँछौं। आज हेरौं भन्ने कुरा भएको छ,’ बैठकमा सहभागी एक जनाले भने, ‘हामीले अनलाइनबाट हुने भुक्तानीलाई पनि नजिकबाट हेर्न भनिरहेका छौं।’ 

The post राष्ट्र बैंकको निर्देशनपछि प्रभु बैंकले तोक्यो निमित्त प्रमुख, लम्साललाई जिम्मेवारी appeared first on BIZMANDU.