काठमाडौं। म्युचुअल फण्डले सेयर बजारमा लगानी निरन्तर बढाएका छन्। म्युचुअल फण्डले पछिल्लो एक महिनामा सेयर बजारमा ४.०५ प्रतिशतले लगानी बढाएका हुन्।

वित्तीय विवरण सार्वजनिक गरेका खुला र बन्दमुखी गरी ५५ वटा म्युचुअल फण्डले माघ मसान्तसम्म ५८ अर्ब ६ करोड ८ लाख रुपैयाँ सेयर बजारमा लगानी गरेका छन्।

यो रकम अघिल्लो महिनासम्मको भन्दा २ अर्ब २५ करोड रुपैयाँ धेरै हो। बैंकको ब्याजदर निरन्तर ओरालो लागेपछि म्युचुअल फण्डले सेयर बजारमा लगानी ब‍ढाएका हुन्।

माघमा ३८ वटा म्युचुअल फण्डले बजारमा लगानी बढाएका छन्। आरबीबी फोकस-४० फण्डले सबैभन्दा धेरै ८५.११ प्रतिशतले लगानी बढाएको छ।

एनआइबीएल सहभागिता फण्डले सर्वाधिक ७ अर्ब ५२ करोड ८२ लाख रुपैयाँ लगानी गरेको छ। बजारमा १६ वटा म्युचुअल फण्डले भने लगानी घटाएका छन्।

म्युचुअल फण्डले सेयर बजारमा गरेको लगानी

बैंकको ब्याजदर निरन्तर ओरालो लागेका कारण अधिकांश म्युचुअल फण्डले मुद्दती निक्षेपमा लगानी शून्य बनाएका छन्। अहिले बैंकको मुद्दतीको ब्याजदर २ प्रतिशतमा झरेको छ। मुद्दतीको लगानीले लागत समेत उठ्ने नदेखिएपछि म्युचुअल फण्डले लगानीको नयाँ उपकरण खोजिरहेका छन्।

म्युचुअल फण्डले बजारमा लगानी बढाए पनि नेप्से परिसूचक भने एउटै विन्दुमा छ। बजारले उचाइ लिन नसकिरहेका बेला फण्डहरु थप लगानीका लागि पर्ख र हेरको अवस्थामा छन्।

माघसम्म म्युचुअल फण्डको बैंक मौज्दात १० अर्ब ४७ करोड रुपैयाँ छ। पुससम्मको तुलनामा यो रकम ३.३ प्रतिशत धेरै हो। पुससम्म म्युचुअल फण्डको बैंक मौज्दात १० अर्ब १४ करोड रुपैयाँ थियो।

मुद्दती निक्षेपमा माघसम्म ११ वटा म्युचुअल फण्डको लगानी ८१ करोड ४० लाख रुपैयाँ छ। यो पुससम्मको तुलनामा ५.७८ प्रतिशत कम हो। बैंकको मुद्दती निक्षेपमा ४४ वटा म्युचुअल फण्डले लगानी शून्य बनाएका छन्।

म्युचुअल फण्डको बैंक मौज्दात र मुद्दती निक्षेपमा लगानी

ब्याजदर घटेपछि सेयर बजारमा लगानी बढाएका म्युचुअल फण्डको खुद सम्पत्तिको मूल्य पनि बढेको छ। माघमा ४२ वटा म्युचुअल फण्डको न्याभ बढ्दा ७ वटाको घटेको छ। ६ वटा म्युचुअल फण्डको न्याभ स्थिर देखिएको छ।

The post सेयर बजारमा लगानी निरन्तर बढाउँदै म्युचुअल फण्ड, पुग्यो ५८ अर्ब, मुद्दतीमा शून्य appeared first on BIZMANDU.