काठमाडौं । साताको पहिलो कारोबार दिन (आइतबार) सेयर बजार परिसूचकमा गिरावट आएको छ । आइतबार २६.५१ अंकले घट्दै बजार २६४९.५२ को बिन्दुमा ओर्लिएको छ ।

उच्च अंकको गिरावटका बिच आज उत्पादन तथा प्रशोधन र सामूहिक लगानी समूहको सूचकबाहेक सबै समूहको सूचक घट्यो । सबैभन्दा बढी लगानी समूहको सूचकमा १.४८ प्रतिशतले गिरावट आयो ।

कम्पनीगतरुपमा २११ कम्पनीको मूल्य घट्दा ४५ कम्पनीको मूल्य बढ्यो भने १ कम्पनीको मूल्य स्थिर रह्यो ।

उच्च अंकले समग्रमा परिसूचक घटेको भएपनि आज ५ कम्पनीको मूल्य भने सकारात्मक सर्किट लेबलमा वृद्धि भयो । सागर डिस्ट्रिलरी, निफ्रा ग्रिन इनर्जी डिभेन्चर, स्वस्तिक लघुवित्त, झापा इनर्जी र श्रीनगर एग्रीटेकको मूल्य सकारात्मक सर्किट लेबलमा बढेको हो ।

आज परिसूचकमा गिरावट आएपनि कारोबार रकममा भने वृद्धि भएको छ । १ करोड ५७ लाख ३६ हजार कित्ता सेयर किनबेच हुँदा कारोबार रकम ७ अर्ब ८ करोड ५४ लाख रुपैयाँमाथिको भयो ।

आजको कारोबार एक महिनायताकै उच्च हो ।

गएको हप्ता सेयर बजार लगातार उकालोमा थियो । एक साताको बिचमा ११५ अंकको बढोत्तरी भएको थियो । सर्ट ट्रम लगानीकर्ताले नाफा बुक गर्दा आज बजार घट्न पुगेको हो । कारोबार बढ्नुले पनि लगानीकर्ता नाफा बुक गर्न झुम्मिएको देखिन्छ ।