अमेरिकाको राजधानी वाशिङ्टन डीसीमा बुधबार भएको गोलीकाण्डमा एक नेशनल गार्ड सदस्यको मृत्यु र अर्का एक गम्भीर घाइते भएपछि वेष्ट भर्जिनियाकी सिनेटर शेली मूर क्यापिटोले आफ्ना राज्यका सैनिकहरूको राजधानीमा उपस्थितिको बचाउ गरेकी छन्।

सिनेटर क्यापिटोले शुक्रबार बिहान फोक्स न्युजमा बोल्दै भनिन्, “अपराधका तथ्याङ्कहरू निकै घटेका छन्। मेरा डेमोक्र्याट सहकर्मीहरूले शहर घुमेर त्यहाँका गार्ड सदस्यहरूसँग कहिल्यै कुरा गरेको होलान् जस्तो लाग्दैन।”

उनले थपिन्, वाशिङ्टनमा नेशनल गार्डको उपस्थिति सार्वजनिक सुरक्षाका लागि अत्यावश्यक रहेको छ।

वेष्ट भर्जिनिया नेशनल गार्डका अनुसार, बुधबार गोली हानिएका दुवै गार्ड सदस्यहरू गत अगस्टदेखि नै राजधानीमा आदेशअनुसार तैनाथ थिए।
वेष्ट भर्जिनियाका गभर्नर प्याट्रिक मोरिसीले राष्ट्रपति डोनाल्ड ट्रम्पको सीधा अनुरोधमा सैनिकहरूलाई डीसी पठाएका थिए।

गोलीकाण्डमा परेका दुईमध्ये एकको मृत्यु भएको छ भने अर्कोको स्थिति गम्भीर रहेको बताइएको छ। घटनाको विस्तृत अनुसन्धान संघीय तथा स्थानीय सुरक्षाकर्मीहरूले गरिरहेका छन्।

सिनेटर क्यापिटोले गार्ड सदस्यहरू राजधानीमा केवल सुरक्षाको लागि नभई नागरिक, पर्यटक, विदेशी अतिथि तथा राजनीतिक व्यक्तिहरूलाई ‘शान्ति छ’ भन्ने स्पष्ट सन्देश दिन तैनाथ गरिएको बताइन्।

उनले भनिन्, “उनीहरू पहिलो नजरमै सुरक्षाको अनुभूति दिलाउने उपस्थिति हुन्।”

बुधबार भएको गोलीकाण्डपछि राष्ट्रपति डोनाल्ड ट्रम्पले राजधानीमा ५०० थप सैनिक पठाउने आदेश माग गरेका छन्। तर, यो कदम कानुनी रूपमा विवादित छ।

गत सप्ताह एक संघीय न्यायाधीशले ट्रम्प प्रशासनको युद्ध मन्त्रालयले डीसीमा नेशनल गार्डलाई गैरकानुनी रूपमा तैनाथ गरेको ठहर गरेका थिए। तर, सो आदेशलाई तुरुन्तै लागू नगरी अपिलका लागि समय दिने निर्णय गरिएको छ, जसले ट्रम्प प्रशासनलाई केही अवधि आफ्नो तैनाथी जारी राख्न अनुमति दिएको छ।

यो पनि पढ्नुहोस् :