काठमाडौँ। पूर्वराष्ट्रिय फुटबल खेलाडी विराटजंग शाहीले अखिल नेपाल फुटबल संघ (एन्फा)को आगामी निर्वाचनमा अध्यक्ष पदका लागि आफ्नो उम्मेदवारी घोषणा गरेका छन्। परिवर्तनका लागि नेतृत्व आवश्यक भएको भन्दै एन्फा उपाध्यक्षसमेत रहेका शाहीले आइतबार उम्मेदवारी घोषणा गरेका हुन्।

देशको जर्सी लगाएर राष्ट्रिय गान गाएको क्षण जीवनको सबैभन्दा ठूलो गर्व रहेको स्मरण गर्दै शाहीले हाल नेपाली फुटबल गम्भीर संकटमा फसिरहेको बताए। “आर्थिक अनियमितता, पारदर्शिताको अभाव, कुशासन, गुटबन्दी र घरेलु लिगको अस्तव्यस्त संरचनाले फुटबल कोमामा पुगेको छ। नियमित प्रतियोगिता नहुँदा खेलाडी, प्रशिक्षक, रेफ्री र अन्य जनशक्तिको विदेशिने क्रम बढिरहेको र नयाँ पुस्तामा फुटबलप्रतिको आकर्षण कमजोर बन्दै गएकोले मैले उम्मेदवारी घोषणा गरेको हुँ,” उनले भने।

उनी फुटबलको सर्वोच्च निकाय फिफाले भ्रष्टाचारी ठहर गर्दै प्रतिबन्ध लगाएको एन्फा पूर्वअध्यक्ष गणेश थापानिकटका व्यक्ति हुन्। थापाको कार्यकालमा उनले एन्फाको कोषाध्यक्षको भूमिकामा काम गरेका थिए। तर, आफू निलम्बनमा परेसँगै थापाले कर्माछिरिङ शेर्पाविरुद्ध पंकजविक्रम नेम्वाङलाई चुनाव लडाएका थिए। नेम्वाङसँग हातेमालो गर्दै शाहीले उपाध्यक्ष पद जितेका हुन्।

तर, नेम्वाङसँग थापाको सम्बन्ध चिसिएसँगै शाहीले आइतबार आगामी निर्वाचनमा अध्यक्ष पदमा उठ्ने घोषणा गरेका हुन्। “फुटबलमा जीवन अर्पण गरेको व्यक्तिका रूपमा चुप लागेर बस्न नसक्ने अवस्था छ। यदि अहिले पनि यी बेथिति अन्त्य भएनन् भने नेपाली फुटबल इतिहासका पानामा सीमित हुन सक्छ। सुशासनसहित इमानदार र सक्षम नेतृत्व आजको पहिलो आवश्यकता हो,” उनले भने।

अध्यक्षमा निर्वाचित भए फुटबलका सबै सरोकारवालालाई एकजुट बनाएर फुटबलको गुमेको प्रतिष्ठा पुनःस्थापित गर्ने आफ्नो प्रमुख उद्देश्य हुने उनले बताए। देशका लागि खेल्दा जस्तै साझा भावनाले सबैलाई समेटेर अघि बढ्ने आत्मविश्वास उनले व्यक्त गरेका छन्।