काठमाडाैँ । नेपालमा एचआईभी संक्रमितको सङ्ख्या ३४ हजार ३ सय ३७ जना रहेका छन् ।

आइतवार विश्व एड्स दिवसको अवसरमा आयोजित अन्तरक्रिया कार्यक्रममा बोल्दै राष्ट्रिय एड्स तथा यौन रोग नियन्त्रण केन्द्रका निर्देशक डा. सर्वेश शर्माले यसबारे जानकारी गराएका हुन्।

उनकाअनुसार कुल संक्रमितमध्ये १५ वर्ष भन्दा माथिका ३३ हजार २ सय ७९ जना रहेका छन् । त्यस्तै १५ वर्ष माथिका १४ हजार जना महिलाहरुमा एचआइभी संक्रमण छ । उनले १५ वर्ष भन्दा माथिका एचआइभी संक्रमित पुरुषहरूको सङ्ख्या १९ हजार २ सय ७९ रहेको छ ।

एक हजार ५८ जना एचआइभी पोजेटिभ बालबालिकाहरू रहेका छन् । गत एक वर्षमा आमालाई एचआइभी परीक्षण गर्दा २ सय २७ जना बालबालिकाहरू संक्रमित फेला परेका छन् । सन् २००० देखि २०२४ सम्म आउँदा नयाँ संक्रमण पनि ७६ प्रतिशतले घटेको डा. शर्माले बताए । सरदर दिनमा १.७ जना नयाँ संक्रमित थपिरहेका छन् भने दिनमा एक जनाको एचआइभीका कारण मृत्यु भइरहेको छ । 

डा. शर्माकाअनुसार ८८ प्रतिशत संक्रमितहरू औषधिको सेवन गरिरहेका छन् । संक्रमितहरूमध्ये ७६ प्रतिशतले शरीरमा भाइरसको मात्रा कति छ भनेर परीक्षण गरिरहेको बताए । आगामी एक वर्षभित्र एचआइभी संक्रमण विरुद्धको रणनीति बनाउनुपर्ने आवश्यकता रहेको उनले बताए ।