काठमाडौं । नेकपा एमालेले आगामी ११औं महाधिवेशनलाई लक्षित गर्दै आइतबार च्यासलस्थित केन्द्रीय कार्यालयमा लोगो सार्वजनिक कार्यक्रममाअध्यक्ष केपी शर्मा ओली, वरिष्ठ उपाध्यक्ष ईश्वर पोखरेललगायत शीर्ष नेताहरूको उपस्थिति थियो।

पछिल्ला दिनमा ओलीको बहिर्गमनसहित पूर्वराष्ट्रपति विद्यादेवी भण्डारीको पक्षमा अभिव्यक्ति दिइरहेका स्थायी कमिटी सदस्य कर्णबहादुर थापा पनि सोही कार्यक्रममा सहभागी थिए।

सार्वजनिक भएको एक भिडिओमा कार्यक्रम सुरू हुन लाग्दै गर्दा ओली च्यासलस्थित तुलसीलाल स्मृति प्रतिष्ठानको भवनमा पुगे। उनलाई हेरेपछि थापाले पनि माथिल्लोतिर उक्लँदै कार्यक्रममा सहभागी हुन खोजे। ओलीले समेत ‘कार्यक्रमतिर जाऔँ’ भन्ने संकेत गर्दै उनलाई बोलाए।

तर त्यस्तै क्रममा अनपेक्षित घटना भयो। ओलीको सुरक्षा सम्हालिरहेका एक युवकले थापालाई रोक्दै धकेलिदिए, जसले गर्दा थापा छिनमै सन्तुलन गुमाउँदै झन्डै लड्ने अवस्थामा पुगे।

तत्कालै थापाले प्रतिकार गरे र एकछिन दुवैबीच तनाबपूर्ण स्थिति बन्यो। एकअर्का पक्षमा धकेलाधकेल चलिरह्यो एकछिन।

सुरक्षागार्डजस्तै भूमिकामा रहेका निलो ज्याकेट र चश्मा लगाएका युवकले थापालाई रोकिरहे, प्रश्न गरे र कठोर शैलीमा थर्काउने प्रयास पनि गरे। आफूलाई धकेलेर हिँडिरहेको ठाउँबाट पन्छाएपछि थापाले ‘के गरेको’ भन्दै आपत्ति जनाएको भिडिओमा सुनिन्छ।

तर अचम्म चाहिं के भने, यसबीचमा ओली केही बोलेनन्। नदेखे जस्तो गरेर अघि बढिरहे। थापालाई ती युवकसहितले थर्काइरहेका थिए।

घटनाबारे बोल्दै थापाले महाधिवेशनको संवेदनशील माहोलमा यस्तो व्यवहारले अन्य अर्थ निकाल्न सकिने टिप्पणी गरे। ‘घटना ठूलो हैन। अध्यक्षले बोलाएपछि अघि बढेको थिएँ, तर कार्यालयमै धकेलिँदै रोकियो। त्यसैले तत्कालै त्यहीँ प्रतिकार गरें’, उनले भने।