काठमाडौं । तपाइँले अहिलेसम्म चन्द्रमामा जानेबारे गीत वा कथा सुन्नुभएको होला। तर, अब चाँडै नै तपाइँ चन्द्रमामा बनेको होटलमा बस्न सक्नुहुनेछ। यो काल्पनिक लाग्न सक्छ। तर, यो वास्तविकता हो।

एउटा स्टार्टअपले चन्द्रमामा होटल बनाउने तयारी गरिरहेको छ र यसलाई सन् २०३२ सम्ममा खोल्ने योजना बनाएको छ। क्यालिफोर्नियामा रहेको अन्तरिक्ष स्टार्टअप ग्यालेक्टिक रिसोर्स युटिलाइजेसन स्पेस (जीआरयू) ले यस परियोजनामा काम गरिरहेको छ। कम्पनीले चन्द्रमामा विश्वको पहिलो स्थायी होटल निर्माण गर्ने दाबी गरेको छ। धेरै मानिसले यस परियोजनामा रुचि देखाइरहेका छन्।

एक दिन बस्दा कति खर्च ?

एनभिडिया, स्पेसएक्स, वाई कम्बिनेटर र डिफेन्स टेक फर्म एन्डुरिलका लगानीकर्ताले यसलाई समर्थन गरिरहेका छन्। यो कम्पनी २१ वर्षीय स्काइलर चानले सुरु गरेका थिए। होटलमा बस्नका लागि बुकिङ पनि सुरु भइसकेको छ। भविष्यमा यात्रा गर्न ग्राहकले आजै बुकिङ गर्न १० लाख डलर तिर्नुपर्नेछ।

अन्तर्राष्ट्रिय सञ्चार माध्यममा प्रकाशित समाचारहरुमा कम्पनीले सन् २०३२ सम्ममा आफ्नो सेवा सुरु गर्ने उल्लेख छ। यसको अर्थ यसले सन् २०३२ मा चन्द्रमामा पाहुनाहरुलाई स्वागत गर्नेछ। प्रतिरातको दर ४ लाख १० हजार डलर हुनेछ। कम्पनीले सबै आवश्यक स्वीकृति प्राप्त गरेपछि सन् २०२९ मा यसको होटलको निर्माण सुरु हुने जनाएको छ।

सेवा कहिले सुरु हुनेछ ?

कम्पनीले स्वीकृति प्राप्त गर्न परीक्षण मिसन सञ्चालन गर्ने लक्ष्य पनि राखेको छ। यदि सबै कुरा कम्पनीको योजना अनुसार भयो भने तपाइँ सन् २०३२ मा चन्द्रमामा कोठा बुक गर्न सक्नुहुनेछ। अन्तरिक्ष स्टेसन निर्माण गर्न पृथ्वीबाट सामग्री पठाइँदै गर्दा कम्पनीले होटल निर्माण गर्न चन्द्रमाको माटो प्रयोग गर्न चाहन्छ।

यदि यो होटल बनाइयो भने आवास र पहुँच निश्चित रुपमा सस्तो हुने छैन। यद्यपि, कम्पनीले आशा गर्दछ कि अन्तरिक्ष यात्रीको संख्या बढ्दै जाँदा होटल दरहरु समयसँगै घट्नेछन्।