काठमाडौँ – आयतोल्लाह अली खामेनी र इरानका शीर्ष सैन्य कमाण्डरहरूको संयुक्त अमेरिकी–इजरायली कारबाहीमा हत्या भएपछि मध्यपूर्व र दक्षिण एसियामा तनाव तीव्र बनेको छ। अमेरिका र इजरायलले इरानको राजधानी तेहरानमा गरेको सैन्य कारबाहीमा खामेनीसहित २०० भन्दा बढी व्यक्तिको मृत्यु भएको जनाइएको छ।

यस घटनाको विरोधमा कराँचीस्थित अमेरिकी वाणिज्य दूतावास बाहिर उग्र प्रदर्शन भएको छ। प्रदर्शनकारीहरूले दूतावासमा ढुङ्गामुढा गर्नुका साथै झ्यालहरू फुटाएका थिए। स्थिति नियन्त्रणमा लिन सुरक्षाकर्मीले अश्रुग्यास प्रहार र लाठीचार्ज गरेका थिए। प्रहरी अधिकारी मोहम्मद जावादका अनुसार झडपका क्रममा सुरक्षा फौजले गोली चलाउँदा एक प्रदर्शनकारीको मृत्यु भएको छ भने कैयौँ घाइते भएका छन्। प्रदर्शनकारीहरूले अमेरिका र इजरायलमाथि क्षेत्रलाई अस्थिर बनाउने प्रयास गरेको आरोप लगाएका छन्।

तेहरानमा भएको आक्रमणमा खामेनीका अतिरिक्त शीर्ष राजनीतिक सल्लाहकार अली सामखानी र सैन्य कमाण्डर मोहम्मद पाकपोर समेत मारिएको बताइएको छ। यसको प्रतिकारस्वरूप इरानले मध्यपूर्वमा रहेका अमेरिकी सैन्य आधारहरूलाई निशाना बनाउने घोषणा गरेको छ र आफ्ना शीर्ष नेताहरूको हत्याको बदला “शक्तिशाली र निर्णायक” रूपमा लिने चेतावनी दिएको छ।

यसैबीच, विश्वको करिब २० प्रतिशत ऊर्जा आपूर्ति हुने रणनीतिक जलमार्ग स्ट्रेट अफ हर्मुजलाई इरानी रिभोलुसनरी गार्ड्सले पूर्ण रूपमा बन्द गरेको घोषणा गरिएको छ।