धनकुटा । फागुन २१ गते हुने प्रतिनिधिसभा सदस्य निर्वाचनका लागि धनकुटामा निर्वाचन तयारी अन्तिम चरणमा पुगेको छ । मतदान प्रक्रियालाई व्यवस्थित र शान्तिपूर्ण बनाउन तालिमपछि निर्वाचन कर्मचारीहरूले आवश्यक सामग्री बुझेर तोकिएका मतदानस्थलतर्फ खटिएका छन् ।

निर्वाचन आयोगको कार्यतालिका अनुसार जिल्लामा खटिएका मतदान अधिकृत, सहायक मतदान अधिकृत तथा सहयोगी कर्मचारीहरूले मतपत्र, मतपेटिका, मतदान गोप्य कक्ष, छाप, मतदाता नामावलीलगायतका ५१ प्रकार सामग्री बुझेर आ–आफ्ना केन्द्रतर्फ गएका हुन । प्रतिनिधि सभा सदस्य निर्वाचनका लागि धनकुटामा १ लाख १८ हजार ४ सय २५ मतदाता रहेका छन् ।

जिल्ला निर्वाचन कार्यालय धनकुटाको तथ्याकं अनुसार धनकुटामा ५९ हजार ४ सय ८३ जना पुरुष र ५८ हजार ९ सय ४२ महिला मतदाता रहेका हुन् । ७ वटा स्थानीय तह रहेको धनकुटामा प्रतिनिधिसभा निर्वाचनका लागि एक मात्रै निर्वाचन क्षेत्र रहेको छ ।

निर्वाचनका लागि धनकुटामा एक सय १९ मतदान स्थालमा एक सय ६६ मतदान केन्द्र रहेका छन् । यस्तै धनकुटामा २ वटा अस्थायी मतदान केन्द्र तोकिएका छन् । धनकुटामा निर्वाचनका लागि सुरक्षाकर्मी र निर्वाचन प्रहरी बाहेक एक हजार २ जना कर्मचारी खटिएका हुन् ।

हरेक मतदान केन्द्रमा सोमबार बेलुकासम्म कर्मचारी पुगिसक्नुपर्ने भएकाले धनकुटा सबै कर्मचारी सोमबार मात्रै खटिएका हुन् । यसअघि मतदानमा खटिने अधिकृत र सहायक अधिकृतलाई १४ र१५ गते तालिम दिइएको थियो भने १६ र १७ गते निर्वाचन सामग्री बुझेको जिल्ला निवार्चन कार्यालयका सुचना अधिकारी सुरज श्रेष्ठले जानकारी दिए ।

मतदान केन्द्रमा खटिएका कर्मचारीले सोमबार नै मतदान केन्द्रमा पुगेर मतदान केन्द्रको क्षेत्र तोक्ने, प्रचारप्रसार निशेध गर्ने सुचना जारी गर्ने, मादक पदार्थ बिक्रि वितरण र सेवन निशेधको सुचना र हातहतियार निशेधको सुचना जारी गर्ने श्रेष्ठले जानकारी दिए ।

मतदातालाई तोकिएको समयमै मतदान केन्द्रमा उपस्थित भई आफ्नो मताधिकार प्रयोग गर्न आग्रह गरिएको छ । जिल्ला प्रशासन र निर्वाचन कार्यालयले शान्तिपूर्ण वातावरणमा मतदान सम्पन्न गराउन सबै पक्षसँग सहयोगको अपेक्षा गरेका छन् ।

The post मतदान केन्द्रमा खटिए कर्मचारी appeared first on राजधानी राष्ट्रिय दैनिक (लोकप्रिय राष्ट्रिय दैनिक)-RajdhaniDaily.com - Online Nepali News Portal-Latest Nepali Online News portal of Nepali Polities, economics, news, top stories, national, international, politics, sports, business, finance, entertainment, photo-gallery, audio, video and more....