एजेन्सी । अन्तर्राष्ट्रिय आणविक ऊर्जा निकाय (आईएईए) ले इरानको नतान्ज आणविक केन्द्रका प्रवेशद्वार भवनहरूमा आंशिक क्षति पुगेको पुष्टि गरेको छ ।

विगत दुई दिनका भूउपग्रह तस्बिरहरूले जारी अमेरिका–इजरायल बमबारी अभियानका क्रममा यो क्षति भएको देखाएका छन् ।

निकायले सामाजिक सञ्जाल एक्समा लेखेको छ, ‘उपलब्ध पछिल्लो भूउपग्रह चित्रणका आधारमा आईएईएले इरानको भूमिगत नतान्ज इन्धन संवर्धन केन्द्रको प्रवेशद्वार भवनहरूमा भर्खरै केही क्षति भएको पुष्टि गर्न सक्छ । यसबाट कुनै रेडियोधर्मी असर पर्ने अपेक्षा गरिएको छैन र एफईपीमा नै कुनै थप प्रभाव देखिएको छैन । त्यो सन् २०२५ को जुन महिनाको द्वन्द्वमा पहिले नै गम्भीर रूपमा क्षतिग्रस्त भएको थियो ।’

नतान्ज केन्द्र गत जुन महिनामा इजरायल र इरानबीच भएको अघिल्लो १२–दिने युद्धको मुख्य लक्ष्यहरूमध्ये एक थियो । अमेरिकाले पनि त्यहाँ आक्रमण गरेको थियो ।