काठमाडौँ । निर्वाचनको मौन अवधि सुरु भएसँगै निर्वाचन आयोगले आचारसंहिता पालना र सामाजिक सञ्जालको प्रयोगमा कडा निगरानी बढाएको छ । जिल्ला आचारसंहिता अनुगमन समिति र अनुगमनकर्ताहरु मार्फत निरन्तर रिपोर्टिङ लिने काम भइरहेको आयोगका प्रवक्ता नारायणप्रसाद भट्टराईले बताएका छन् ।

पहिलो रणनीति अन्तर्गत, कुनैपनि सूचना लाइक, सेयर वा कमेन्ट गर्नुअघि त्यो सत्य र आधिकारिक हो वा होइन भनी यकिन गर्न सार्वजनिक रुपमा अपिल गरिएको गरेको भट्टराईले बताएका छन् ।

यसुका लागि आयोगले प्रवद्र्धनात्मक तरिकाले सम्झाउने र बुझाउने काम गरिरहेको छ । दोस्रो रणनीति अन्तर्गत कसैले सामाजिक सञ्जालमार्फत गालीगलौज गर्ने, अपमान गर्ने वा भ्रामक सूचना फैलाउने जस्ता कानुन विपरीतका कार्य गरेमा कडा कारबाही गरिने स्पष्ट पारेका छन् । यसका लागि आयोगमा ‘सूचना सदाचार प्रवद्र्धन इकाई’ गठन गरिएको छ । जसले यस्ता गतिविधिहरुको सुक्ष्म निगरानी गरिरहेको छ ।

त्यस्तै, आयोगले सामाजिक सञ्जाल सञ्चालक कम्पनीहरु, नेपाल प्रहरी, प्रेस काउन्सिल र नेपाल दूरसञ्चार प्राधिकरण जस्ता नियमनकारी निकायहरुसँग नियमित समन्वय र सहकार्य गरिरहेको पनि भट्टराईले बताएका छन् । विज्ञहरुको टोलीले आयोगमै बसेर सेवा दिइरहेको हुँदा कानून विपरीतका गतिविधि गर्नेहरु तत्काल कानूनी दायरामा आउने प्रवक्ता भट्टराईले बताएका छन् ।

काठमाडौँ । नेपाल स्टक एक्सचेन्ज (नेप्से) ले पूँजी बजारको डिजिटल पूर्वाधार सुरक्षित र विश्वसनीय बनाउन ‘आईटी अडिट गाइड लाइन्स, २०२६’ जारी गर्दै ब्रोकर कम्पनीका लागि अनिवार्य सूचना प्रविधि (आईटी) अडिट व्यवस्था लागू गरेको छ ।

नयाँ प्रावधान अनुसार प्रत्येक ब्रोकरले दुई वर्षमा कम्तीमा एकपटक आईटी अडिट गराउनुपर्नेछ भने नयाँ ब्रोकरले कारोबार सुरु गरेको ६ महिनाभित्र पहिलो अडिट सम्पन्न गर्नुपर्नेछ । 

अडिट मान्यता प्राप्त आईटी विज्ञ वा अडिट फर्ममार्फत गराइ प्रतिवेदन नेप्सेसमक्ष पेस गर्नुपर्नेछ । निर्देशिका अनुसार ट्रेड म्यानेजमेन्ट सिस्टम (टीएमएस), ब्याक अफिस सफ्टवेयर, ग्राहक डेटा व्यवस्थापन, सर्भर, डाटाबेस, नेटवर्क, वेबसाइट तथा मोबाइल एप लगायत सम्पूर्ण डिजिटल संरचना परीक्षणको दायरामा पर्नेछन ।

त्यस्तै, प्रयोगकर्ता प्रमाणीकरण, डेटा ब्याकअप, फायरवाल, इन्क्रिप्सन र साइबर सुरक्षा नीतिको प्रभावकारिता पनि अनिवार्य रूपमा परीक्षण गर्नुपर्नेछ । 

नेप्सेले अनलाइन कारोबार विस्तारसँगै बढ्दो साइबर जोखिमलाई मध्यनजर गर्दै अडिटलाई संस्थागत गरेको जनाएको छ । निर्देशिका उल्लङ्घन गर्ने ब्रोकर कम्पनीमाथि कारबाहीको व्यवस्था समेत राखिएको छ ।

काठमाडौँ । चुनावको मुखमा काठमाडौँ लगायत विभिन्न ठाउँका पेट्रोल पम्पमा व्यापक भीड लागेको छ । एकाएक पेट्रोलियम पदार्थको ‘सर्टेज’ हुने अफवाह फैलिएपछि पेट्रोल पम्पहरुमा सर्वसाधारणको व्यापक भीड लागेको हो ।

यसो त चुनावमा पेट्रोलियम पदार्थ नपाइने हल्ला सोमबारदेखि नै चलेको थियो । 

तर, नेपाल आयल निगमले भने निर्वाचनमा पनि इन्धन नियमित हुने बताएको थियो । यद्यपि अहिले काठमाडौँका विभिन्न पेट्रोल पम्पमा सवारी साधनको लामो लाइन लागेको छ । अझ कतिपयले त जार र जर्किन नै लिएर पनि पेट्रोल पम्प पुगेका छन् । बाँकी तस्विरमा हेर्नुहोस्ः

काठमाडौँ । ज्योतिषी रुद्रनाथ अधिकारी पक्राउ परेका छन् । चुनाव नहुने भन्दै भविष्यवाणी गरेका अधिकारीलाई काठमाडौँ प्रहरीले पक्राउ गरेको हो । 

उनले ग्रहण लाग्ने समयमा चुनाव गर्ने मिति तोकिएको भन्दै चुनाव नहुने र भए पनि अनिष्ठ हुने भविष्यवाणी गरेका थिए । 

निर्वाचन नहुने भन्दै भविष्यवाणी गरेर निर्वाचन बिथोल्ने गतिविधि गरेको भन्दै उनलाई मच्छेगाउँस्थित उनकै घरबाट पक्राउ गरिएको प्रहरीले जनाएको छ । 

परिवार स्रोतका अनुसार ज्योतिष अधिकारीलाई नियन्त्रणमा लिँदा प्रहरीले कुनै पुर्जी वा कागज देखाएको थिएन । उनलाई १० मिनेट कुरा गर्नुपर्यो भन्दै लगिएको परिवार स्रोतको भनाई छ । तर, साँझ अबेरसम्म पनि घर नफर्किएपछि बुझ्दा उनलाई पठाउन नमिल्ने र सम्मानसाथ राखिएको प्रहरीले बताएको अधिकारीको पारिवारिक स्रोतले बताएको छ । 

अन्य ज्योतिषीहरुले भने उनको पक्राउको विरोध गरेका छन् ।