काठमाडौं। ललितपुरको अल्का अस्पताल पछाडि साढे ३ तले व्यावसायिक घर बिक्रीमा राखिएको छ। सितिमिति घरजग्गा पाउनै मुस्किल हुने क्षेत्रको व्यावसायिक भवन टिकटकमा बिक्रीमा राखिएको हो।

मुख्य सडक अगाडि ३.५ आनामा बनेको घरको मूल्य ६ करोड ६० लाख रुपैयाँ तोकिएको छ। १८ फिट सडक अगाडि बनेको घरअगाडि सार्वजनिक बगैंचासमेत छ।

बुढानीलकण्ठमा २९ आनामा बनेको पाँच बेड रुम भएको २.५ तल्ले घर पनि बिक्रीमा राखिएको छ। १३ फिट सडक अगाडिको घरको मूल्य २६ करोड ५० लाख रुपैयाँ तोकिएको छ।

कुपन्डोलमा १६ फिटको सडक जोडिएको ६ आना जग्गामा पाँच बेड रुम भएको घर ६ करोड ५० लाख बिक्रीमा राखिएको छ।

बालुवाटार विशालनगरमा घर १२ फिट बाटोको ८ आनामा जग्गा ७५ लाखका दरले बिक्रीमा राखिएको छ। ग्राहकले घर सित्तैंमा पाउनेछन्।  

हरिसिद्धिमा ४५ आनामा बनेको घर १६ करोडमा बिक्रीमा चढाइएको छ। यो घर २० फिटको  सडकमा जोडिएको छ।

यस्ता प्राइम पोर्टी अहिले एकपछि अर्कोगरी बिक्रीमा राखिएको छ। आफू बस्न बनाएको घर आर्थिक संकट ब्योहोरिरहेकाहरुले बिक्री गर्न चाहेको टिकटकमा देख्न सकिन्छ। बानेश्वरदेखि बालुवाटार, थापाथलीदेखि गोल्फुटारसम्म प्राइम लोकेसनका घरजग्गा बिक्रीमा छन्।

नेपाल घरजग्गा व्यवसायी महासंघका महासचिव रोशन भोयद्योले आर्थिक समस्यामा परेकाहरुले सामाजिक सञ्जालमार्फत घर बिक्रीमा राखिरहेको बताए। ‘बैंकको ब्याज तिर्नका लागि पैसाको जोहो गर्न नसक्नेहरुले धमाधम सामाजिक सञ्जालमार्फत घर बिक्रीमा राखेको देखिएको छ। प्राइम लोकेसनका पोपर्टी सस्तो मूल्यमा बिक्रीमा राख्नु भनेको आर्थिक संकट हो,’ भोयद्योले भने।

घरको मूल्य सोध्न तह तहका ब्रोकर पार गरेपछि मात्र पुगिनेमा अहिले टिकटकमै मूल्य खुलाएर भिडियोसहित प्रोपर्टी बिक्रीमा आउन थालेका छन्।

भक्तपुरमा घरजग्गा ब्रोकरको काम गर्दै आएका प्रविन लामा बैंकदेखि सहकारीको ऋण तिर्नुपर्ने चाप बढेकोले पछिल्ला दिन घर बिक्री गर्न चाहनेहरु बढेको बताउँछन्।

घरजग्गा व्यापार ओरालो लागेको बेला ब्याज कसरी तिर्ने भन्ने तनाव बढाउनुभन्दा साँवा उठाएर चुपचाप बस्ने भन्दै धेरैले घर बिक्रीमा राखेको लामाले बताए। ‘अहिले भक्तपुरका गठ्ठाघर, कौशलटार, सूर्यविनायकजस्ता ठाउँमा पनि घर बिक्रीमा छन्,’ लामाले भने।

बैंकको ब्याज तिर्न नसक्ने स्थितिले गर्दा कतिपयले जग्गा किन्दा घर सित्तैंमा पाइने अफर राखेका छन्। नेपाल रियलस्टेट अर्गनाइजेसनका महासचिव विनोद सुवेदी आर्थिक संकटबाट बाहिर निस्किने अरु उपाय नभएपछि कतिपयले घरको मूल्यविनै जग्गा बिक्रीमा राखेको बताए।

‘अहिले फाइनन्सियल प्रेसर पनि छ। राष्ट्र बैंकले सहजीकरण गरेको समय पनि सकिएको छ,’ सुवेदीले भने, ‘यसले पनि प्राइम लोकेसनका घरजग्गा बिक्रीमा चढेको देखिन्छ।’

प्राइम पोपर्टी बिक्रीमा चढे पनि किन्ने ग्राहक भने देखिएका छैनन्। घरजग्गा व्यवसायीका अनुसार ग्राहक फेला पार्नै मुस्किल छ। उनीहरुको भनाइलाई सरकारी आकडाले पनि पुष्टि गर्छ।

चालु आर्थिक वर्ष कात्तिकमा घरजग्गा कारोबारबाट सरकारले जम्मा २ अर्ब ७४ करोड ५१ लाख रुपैयाँ राजस्व उठाएको भूमि व्यवस्थापन तथा अभिलेख विभागको तथ्यांक छ। चालु वर्ष साउनपछि कारोबार क्रमश: ओरालो लागिरहेको छ।

विभागका अनुसार घरजग्गा कारोबारबाट साउनमा ३ अर्ब २८ करोड, भदौमा ३ अर्ब १४ करोड र असोजमा २ अर्ब ७५ करोड ८५ लाख रुपैयाँ राजस्व उठेकामा कात्तिकमा अझै घटेको हो।

घरजग्गा व्यवसायीहरु लगानी गर्ने हिसाबले अहिले घरजग्गामा पैसा हाल्नेहरु भेटाउनै मुस्किल पर्ने बताउँछन्।

‘घरजग्गाको कारोबार चार वर्षयता निक्कै सुस्त छ। मूल्य बढ्न सकेको छैन। घरजग्गाको माग नै नभएपछि बैंकसँग ऋण लिएर कसले पो लगानी गर्छ र?,’ सुवेदीले भने, ‘पछिल्ला दिनमा जेनजी आन्दोलनले पनि मानिसहरु लगानी गर्न डिस्करेज भइरहेका छन्। प्रायम पोपर्टी सस्तो मूल्यमा बिक्रीमा राख्दा पनि ग्राहक नपाउनुको कारण भनेको लगानी गर्न हिच्किचाउनु हो।’

The post प्राइम लोकेसनका घर सस्तो मूल्यमा धमाधम बिक्रीमा राखिंदै, तर पाइँदैनन् ग्राहक appeared first on BIZMANDU.