काठमाडौं । हालै मात्र नेपाल प्रवेश गरेको अन्तर्राष्ट्रिय चेन होटल व्यवस्थापक लुभ्र होटल्स ग्रुपले देशमा ७ होटल व्यवस्थापन गर्दैछ । लुभ्र होटल्स ग्रुपले विभिन्न ब्रान्डमा नेपालमा ७ वटा अन्तर्राष्ट्रिय पाँचतारे स्तरका होटलको व्यवस्थापन सम्हाल्न लागेको हो ।

हाल देशमा २ वटा होटल रोयल टुलिप ब्रान्डमा सञ्चालन सुरु भइसकेका छ । यसैगरी थप ५ वटा होटल व्यवस्थापनको जिम्मा लुभ्रले पाइसकेको छ । यीमध्ये ३ होटल सन् २०२५ अगावै सञ्चालनमा आउनेछन् । यसले फ्रान्सेली होटल व्यवस्थापकको एग्रेसिभ लय देखाउँछ ।

विश्वभर ७० देशमा १ हजार ७५० भन्दा बढी होटलको व्यवस्थापन सम्हालिसकेको फ्रेन्च होटल ग्रुप लुब्र ललितपुरको रोयल टुलिप काठमाडौंबाट नेपाल प्रवेश गरेको हो । त्यसयता सौराहस्थित रोयल टुलिप चितवनमा पनि लुभ्रले नै व्यवस्थापन सम्हालेको हो ।

लुभ्रले प्रिमिएर क्लासे, रोयल टुलिप, गोल्डेन टुलिप, टुलिप इन, क्याम्पानाइल, काइरियाड, सरोवर लगायत ब्रान्डमा अन्तर्राष्ट्रियस्तरमा चेन विस्तार गरिरहेको छ ।

लुभ्र संसारकै दोस्रो ठूलो होटल ग्रुप जिनजियाङ इन्टरनेसनल होल्डिङ्ससँग आवद्ध छ ।

लुभ्रले डिसेम्बरदेखि राजधानीको बुढानिलकण्ठमा सञ्चालनमा आउन लागेको पाँचतारे लक्जरी रिसोर्टको व्यवस्थापन सम्हाल्दै छ । रोयल टुलिप काठमाडौं र रोयल टुलिप चितवनपछि लुभ्रले व्यवस्थापन सम्हाल्ने नेपालमा तेस्रो पाँचतारे हुनेछ, बूढानीलकण्ठको होटल ।

क्यासिक भ्यू रिसोर्टले बनाइरहेको रोयल टुलिप बूढानीलकण्ठको प्रिओपनिङ आगामी डिसेम्बर ३१ मा गर्ने तयारी छ । यो पाँचतारे स्तरको लक्जरी रिसोर्ट बूढानीलकण्ठको डाँडागाउँमा छ ।

रिसोर्टमा ८४ वटा कोठा हुने छन् । जसमध्ये मूल भवनमा ५४ वटा कोठा हुने छ भने बाँकी कोठा छुट्टाछुट्टै भिल्लामा सञ्चालन हुने क्यासिक भ्यू रिसोर्टका अध्यक्ष मुकुन्द कुवँरले क्लिकमान्डुलाई जानकारी दिए ।

यो होटल दुइ वर्ष अगाडि नै सञ्चालनको तयारी गरेर रोयल टुलिपसँग सम्झौता भए तापनि प्राविधिक तयारी नपुगेका कारण केही ढिलो हुन पुगेको कुँवरको भनाइ छ ।

‘हाई इन्ड टुरिष्ट’का लागि सौराहामा पाँचतारे रोयल टुलिप सुरु, एउटै कोठाको लाख रुपैयाँ

यो लग्जरी रिसोर्ट रोयल टुलिप काठमाडौंभन्दा अगाडि नै सम्झौता भए तापनि रिसोर्टको क्षमता बढाएर सञ्चालन गर्ने योजनापछि केही समय ढिलो गरेर खुल्न लागेको हो । बूढानिलकण्ठको यो रिर्साट २० रोपनी क्षेत्रफलमा फैलिएको छ ।

लुभ्र ग्रुपले रोयल टुलिपकै ब्रान्ड चितवमा लक्जरी रिसोर्टको व्यवस्थापन सम्हालिसकेको छ । रामेश्वर साहको केटीएम हस्पिटालिटी ग्रुपको रोयल टुलिप चितवन ६५ कोठाको रिसोर्ट हो । रोयल टुलिपकै ब्रान्डमा काठमाडौंमा सञ्चालनमा आएको होटल क्षमताका हिसाबले नेपालकै ठूलो ३०८ कोठाको होटल हो । यो होटल ललितपुरको ग्वार्कोमा राजेन्द्र शाक्यको गुण ग्रुपले बनाएको हो ।

बूढानीलकण्ठमा सञ्चालनमा आउने रोयल टुलिपकै ब्रान्डको नेपालका लागि तेस्रो होटल हो । भैरहवामा गोल्डेन टुलिप, विराटनगरमा सरोवर र जनकपुरमा पनि लुभ्र ग्रुपकै होटल सञ्चालन हुँदै गरेकाले नेपालमा सात वटाको व्यवस्थापन पुगेको हो ।

भैरहवामा लुभ्रकै व्यवस्थापनमा शनिभा इन बुटिक होटल एन्ड स्पाको चारतारे होटल गोल्डेन टुलिप होटल सञ्चालनको तयारी गरिएको छ । यो होटल पनि सन् २०२५ भित्रै सञ्चालनमा आउने छ । यसैगरी वीरगन्जमा सरोवर होटल समेत लुभ्र होटल समूहले नै सञ्चालन गर्दै छ ।

यी बाहेक अरु २ होटल नेपालगञ्ज र जनकपुरमा सञ्चालनको तयारी गरिएको छ ।

नेपालकै ठूलो पाँचतारे होटल रोयल टुलिप पूर्णक्षमतामा सञ्चालनमा आउने (भिडियोसहित)

राजेन्द्र शाक्यको रोयल टुलिप होटल सञ्चालनमा,  सबैभन्दा ठूलो पाँचतारे होटलको रुपमा सेवा सुरु