काठमाडौंँ । मंगलबार सेयरबजार बढेको छ । नेपाल स्टक एक्सचेन्जका अनुसार मंगलबार सेयर मापक सूचक नेप्से परिसूचक ३८.५२ अंकले बढेर २७१२.४९ अंकमा पुगेको छ ।

आजको दिन नेप्सेमा कारोबार भएका सबै कम्पनीको सेयरमूल्य बढेको छ । मंगलबार नेप्सेमा आँखुखोला जलविद्युत् कम्पनीको सबैभन्दा धेरै कारोबार भएको छ । कम्पनीको ३४ करोड ६५ लाख बढिको कारोबार भएको छ ।

आज नेप्सेमा सालपा विकास बैंक र पन्चकन्या हाइड्रोपावर र रिलायन्स स्पिनिङ मिल्सका लगानीकर्ताले सबैभन्दा धेरै कमाएका छन् । यी तिन ओटै कम्पनीको सेयरमूलय ९ प्रतिशत भन्दा माथि वृद्धि भएको छ ।

कुल ३२९ कम्पनीको १ करोड ५१ लाख ८४ हजार ६ सय ७ कित्ता सेयर किनबेच हुँदा ६ अर्ब २३ करोड ४३ लाख बढिको सेयर कारोबार भएको नेप्सेले जनाएको छ ।

काठमाडौँ । हिमाल वाटर पार्क भिलेज होटल प्राइभेट लिमिटेडले आईपीओ निष्कासन गर्ने भएको छ । कम्पनीले आईपीओको प्रस्ताव पारित गर्न दोस्रो वार्षिक साधारण सभा डाकेको छ ।

फागुन १४ गते बसेको कम्पनीको सञ्चालक समितिको बैठकले आगामी चैत १२ गते पर्सामा रहेको कम्पनीको रजिष्टर्ड कार्यालयमा दिउँसो १ बजेदेखि सभा आयोजना गर्ने निर्णय गरेको छ ।

सभामा आईपीओ निष्कासन गर्ने, आईपीओ निष्कासन गर्ने क्रममा आवश्यक कागजात तथा नियमनकारी निकायसँग पत्राचार गर्ने तथा आवश्यक अख्तियारी दिने, कम्पनीको प्रबन्धपत्र तथा नियमावलीमा आवश्यक संशोधन गर्ने र नियमनकारी निकायबाट कुनै थपघट गर्न निर्देशन प्राप्त भएमा सञ्चालक समितिलाई अख्तियारी दिने र कम्पनीको नाम परिवर्तन गर्ने जस्ता विशेष प्रस्तावहरु पारित गरिनेछन् ।

यस्तै सभामा गत आवको वित्तीय विवरण र सञ्चालक समितिको वार्षिक प्रतिवेदन समेत पारित गरिने कम्पनीले जनाएको छ ।

काठमाडौँ । प्रभु इन्स्योरेन्स कम्पनीले लाभांश घोषणा गरेको छ । कम्पनीले आफ्ना सेयरधनीहरुलाई ९.१५ प्रतिशत लाभांश दिने घोषण गरेको हो ।

कम्पनीको फागुन १७ गते बसेको संचालक समितिको बैठकले आव २०८१ ८२ को मुनाफाबाट आफ्ना सेयरधनीहरुलाई उक्त लाभांश दिने निर्णय गरेको हो ।

कम्पनीले वितरणयोग्य मुनाफाबाट कायम चुक्तापूँजी १ अर्ब ७० करोड ९ लाख रुपैयाँको ८.७० प्रतिशत बोनस सेयर र कर प्रयोजनका लागि ०.४६७९ प्रतिशत नगद लाभांश गरी कुल ९.१५७९ प्रतिशत लाभांश दिने घोषणा गरेको हो ।

उक्त लाभांश नेपाल बीमा प्राधिकरणबाट स्वीकृति भई कम्पनीको आगामी वार्षिक साधारण सभाले पारित गरेपछि वितरण हुनेछ ।

काठमाडौँ। इरानमाथि अमेरिका र इजरायलले आक्रमण गरेपछि मध्यपूर्वमा फैलिएको द्वन्द्वको प्रत्यक्ष असर संयुक्त अरब इमिरेट्स (यूएई) को वित्तीय क्षेत्रमा देखिएको छ।

इरानी सर्वोच्च नेता आयातोल्लाह खामेनीको मृत्यु र त्यसपछि यूएईमा भएका ड्रोन तथा मिसाइल आक्रमणका कारण यूएईले आफ्ना प्रमुख स्टक एक्सचेन्जहरू बन्द गर्ने निर्णय गरेको छ। यूएईको वित्तीय नियामक निकायले दुबई र आबुधाबीका सेयर बजारहरू सोमबार र मंगलबारका लागि बन्द रहने घोषणा गरेको हो।

क्षेत्रीय द्वन्द्वका कारण मध्यपूर्वमा यसरी सेयर बजार नै बन्द गरिएको यो पहिलो घटना हो। यसअघि यूएईले राष्ट्रिय शोकका बेला मात्र बजार बन्द गर्ने गरेको थियो। यो कदमले एकातिर बजारलाई तत्कालीन पतनबाट जोगाउन खोजेको छ भने अर्कोतिर अन्तर्राष्ट्रिय लगानीकर्ताहरूमाझ दुबईको ‘सुरक्षित वित्तीय हब’ को पहिचानमा प्रश्नचिह्न खडा गरिदिएको छ।

अबुधाबीको मुख्य विमानस्थलमा भएको आक्रमणमा एक जनाको मृत्यु र सातजना घाइते भएपछि सुरक्षा र आर्थिक जोखिमलाई मध्यनजर गर्दै यो कदम चालिएको हो। यूएईको सेयर बजार बन्द हुनुका मुख्य कारणहरू यस्ता छन् :

१. ‘प्यानिक सेलिङ’ रोक्ने प्रयास
यूएईको पुँजी बजार प्राधिकरणले दुबई र आबुधाबीका सेयर बजारहरू सोमबार र मंगलबारका लागि बन्द गरेको छ। क्षेत्रीय अस्थिरताका कारण लगानीकर्ताहरूमा ‘प्यानिक सेलिङ’(अत्तालिएर सेयर बेच्ने प्रवृत्ति) बढ्न सक्ने र बजार पूर्ण रूपमा ध्वस्त हुन सक्ने जोखिमलाई ध्यानमा राख्दै यो कदम चालिएको हो।

२. क्षेत्रीय र विश्वव्यापी प्रभाव
यूएईको यो कदमसँगै अन्य बजारहरूमा पनि गिरावट देखिएको छ। यूएईको यो निर्णयसँगै विश्वभरका सेयर बजारमा नकारात्मक असर देखिएको छ। साउदी अरबको तादावुल इन्डेक्स चार प्रतिशतले ओरालो लागेको छ।

त्यस्तै इजिप्टको ईजीएक्स ३० मा २.५ प्रतिशतको गिरावट आएको छ। एसियाली बजारहरू जापानको निक्केई १.४ प्रतिशत र हङकङको ह्याङ सेङ २.२ प्रतिशतले ओरालो लागेको छ।

३. लगानीकर्ताको विश्वासमा संकट
क्षेत्रीय द्वन्द्वका कारण मध्यपूर्वमा यसअघि कहिल्यै पनि यसरी सेयर बजार बन्द गरिएको थिएन। विश्लेषकहरूका अनुसार यो निर्णयले दुबईलाई सुरक्षित वित्तीय हबको रूपमा स्थापित गर्ने प्रयासमा धक्का पुऱ्याउन सक्छ। बजार बन्द हुँदा लगानीकर्ताले आवश्यक परेको बेला नगद निकाल्न पाउँदैनन्। जसले गर्दा पुँजी पलायनको खतरा बढ्छ।

४. यूएईको सेयर बजारको भविष्य
करिब १.१ खर्ब अमेरिकी डलरको बजार पुँजीकरण भएको यूएईको सेयर बजार पछिल्लो समय राम्रो वृद्धिमा थियो। विज्ञहरूका अनुसार यो बन्द ‘सावधानीपूर्ण हस्तक्षेप’ मात्र हो र यूएईको आर्थिक आधारशिला अझै बलियो छ। यद्यपि, युद्ध लम्बिएमा यसले दीर्घकालीन रूपमा लगानीकर्ताको मनोबल कमजोर बनाउने देखिन्छ। विश्वको सबैभन्दा ठुलो सेयर बजार न्युयोर्क स्टक एक्सचेन्जको बजार पुँजीकरण करिब ४४ खर्ब अमेरिकी डलरको छ। मध्यपूर्वको सबैभन्दा ठुलो सेयर बजार साउदी एक्सचेन्जको मूल्य तीन खर्ब अमेरिकी डलरभन्दा बढी छ।