पोखरा तेर्सापट्टिस्थित एभरग्रीन एकेडेमीले मौलिक सांस्कृतिक प्रस्तुतीका साथ ‘कल्चरल शो’ सम्पन्न गरेको छ ।

साविक कल्पना सिनेमा हलको स्थानमा अत्याधुनिक भवन निर्माण गरी यसै शैक्षिक सत्रदेखि सञ्चालनमा आएको एकेडेमीले पहिलो पटक सांस्कृतिक प्रस्तुती कार्यक्रम राखेको हो ।

करीब साढे ३ घण्टा चलेको कार्यक्रममा विद्यार्थीहरुले नेपाली परम्परागत संस्कृतिलाई गीत, नृत्यका रुपमा प्रस्तुत गरे । चेतनामूलक नाटक प्रस्तुतीका साथै एकेडेमीका शिक्षिकाहरु, नृत्य शिक्षकहरुले समेत प्रस्तुती राखे ।

विद्यार्थीहरुले नेपालको मौलिक बाजागाजा, औजारहरु, कृषि सामाग्रीहरुका बारेमा परिचयात्मक प्रस्तुती पनि राखे । अभिभावकहरुले विद्यालयले प्रतिभा प्रस्फुटनका यस्ता कार्यक्रम राखेकोमा विद्यालय परिवारलाई धन्यवाद व्यक्त गरे ।

विद्यालय सञ्चालक समिति अध्यक्ष नारायण पौडेलले अहिले टोडलरदेखि कक्षा ५ सम्मको पढाइ सञ्चालन गरेको एभरग्रीन एकेडेमीले आगामी शैक्षिक सत्रमा कक्षा ६ देखि ८ सम्मको कक्षा थप गर्ने जानकारी गराए ।

उनले विद्यार्थीहरुलाई सानैदेखि आफ्नो मौलिक पहिचान, भेषभुषा, राष्ट्रियतचा सम्बन्धमा जानकारी आवश्यक हुनाले यो कार्यक्रम आयोजना गरेको बताउँदै अन्तरनिहीत प्रतिभा अभिवृद्धिका लागि पनि सहयोग पुग्ने उल्लेख गरे ।

विद्यालयका निर्देशक किरण सापकोटाले विद्यार्थीलाई अक्षर चिनाउँदै उनीहरुलाई सिर्जनात्मक, व्यावहारिक बनाउन ऐकेडेमी क्रियाशील रहेको बताए ।

विद्यार्थीहरुका आ–आफ्नै सिर्जनात्मक क्षमता हुने भएकाले विद्यालयले पनि सोहि बमोजिमको वातावरण तयार गर्नुपर्ने हुनाले यस्ता प्रकारका कार्यक्रमलाई निरन्तरता दिइने उनले बताए ।

विद्यालयमै नर्ससहितको हेल्थ डेस्क, साइन्स ल्याब, लाइब्रेरी, तल्ला चढ्न लिफ्टसहित अत्याधुनिक सेवासुविधा उपलब्ध एकेडेमीमा हाइजेनिक खाजाको व्यवस्था, एसीसहितको बस सुविधा, सबै विद्यार्थीका लागि कपडा तथा किताब राख्ने दराजको व्यवस्था गरिएको छ ।

काठमाडौं । इम्बार्क अनम्याथले प्रिमियर इन्टरनेशनल आइबी कन्टिन्यूम स्कुलसँगको साझेदारीमा एक नवीन सिकाइ–केन्द्रित गणित सत्र सम्पन्न गरेको छ ।

कार्यक्रममा विद्यार्थीले हाल चलिरहेको नेपाल प्रिमियर लिग (एनपीएल) सिजन २ बाट प्रेरित लाइभ मोक क्रिकेट ‘अक्शन’ मा सहभागी हुँदै खेलकुदको रोमाञ्चलाई रणनीतिका साथ गणितीय सिकाइसँग जोड्ने अनुभव पाए । यस गतिविधिले विद्यार्थीहरूलाई गणितका अवधारणाहरू वास्तविक परिस्थितिमा कसरी प्रयोग हुन्छन् भन्ने अनुभव पनि गराएकाे थियाे ।

यस सत्रमा ६० विद्यार्थी, तीन शिक्षक तथा चितवन राइनोजका विशेष अतिथि बिपिन आचार्य सहभागी थिए । आचार्यले अनलाइनमार्फत खेलाडी छान्ने रणनीतिबारे आफ्नो पेशागत अनुभव सुनाएका थिए । यस गतिविधिमा विद्यार्थीले व्यावसायिक खेलकुदमा गणितीय सोचले कसरी निर्णयमा प्रभाव पार्छ भन्ने कुरा सिकेका थिए । उनीहरूले सांख्यिकीय विश्लेषण, बजेट व्यवस्थापन, सम्भाव्यता र रणनीतिगत योजना प्रयोग गरेर निर्धारित रकमभित्रै सन्तुलित टिम निर्माण गर्ने अभ्यास पनि गरे ।

इम्बार्क अनम्याथका सह–संस्थापक दिवेश बठीजाले भनेः “हरेक फ्रेन्चाइज टिमका लागि खेलाडीको सही संख्या र सीपको राम्रो संयोजन मिलाउन गणित नै मुख्य आधार हो । गणित र रणनीतिक योजना बिना प्रभावकारी निर्णय लिन सकिँदैन । यही कुरा यो सत्रको मुख्य सन्देश पनि हो ।”

विद्यार्थीले लाइभ अक्शनको दबाब र रोमाञ्चको बीचमै गणितका विभिन्न अवधारणामा सक्रिय रूपमा सहभागी भएर सिके । एक विद्यार्थीले आफ्नो अनुभव सुनाउँदै भने, “यो मोक अक्शनमा हामीले हिसाबकिताब गरेर जोखिम कसरी लिनुपर्छ, कहाँ बुद्धिमानी रूपमा लगानी गर्नुपर्छ र समूह तथा खेलाडीहरूलाई प्रभावकारी रूपमा कसरी व्यवस्थापन गर्नुपर्छ भन्ने सिक्यौँ । यसले राम्रो निर्णय लिन कति धेरै अनुसन्धान र तयारी चाहिन्छ भन्ने पनि बुझायो । हामीलाई यो साँच्चिकै स्मरणीय अनुभव लाग्यो ।”

अर्का विद्यार्थीले थपे, “यो सत्रले हाम्रो गणित बुझ्ने क्षमता र निर्णय गर्ने कौशल अझै बलियो बनायो । हामीले सोचविचार गरेर बोली कसरी लगाउने भन्ने रणनीति बनायौँ र गणितीय दृष्टिबाट टिम कसरी बनाइन्छ भन्ने कुरा सिक्यौँ ।”

प्रीमियर इन्टरनेशनल स्कुल, नेपालकै एकमात्र आइबी कन्टिन्यूम स्कुल, सबै कक्षामा अनुभव र खोजीमूलक सिकाइलाई जोड दिन्छ । स्कुलले वास्तविक जीवनमा लागू हुने ज्ञान, आलोचनात्मक सोच र विभिन्न विषयबीचको सम्बन्धमा विशेष ध्यान दिन्छ । यसले विद्यार्थीहरूलाई केवल गणितमा मात्र दक्ष बनाउँदैन, दैनिक जीवनका जटिल समस्याहरू समाधान गर्न आवश्यक आत्मविश्वास र सीप पनि विकास गराउँछ ।

काठमाडौँ। नेपाल विज्ञान तथा प्रविधि प्रज्ञा प्रतिष्ठान (नास्ट) ले सामुदायिक विद्यालयका शिक्षकहरूको क्षमता अभिवृद्धि गर्ने उद्देश्यले आधुनिक प्रविधियुक्त तालिम प्रदान गर्न सुरु गरेको छ।

पठनपाठनलाई समयसापेक्ष बनाउँदै कक्षाकोठामा आर्टिफिसियल इन्टेलिजेन्स (एआई) जस्ता नवीनतम प्रविधिको प्रयोग बढाउन नास्टले यो पहल थालेको हो। नास्टको विज्ञान तथा प्रविधि सूचना प्रणाली केन्द्रअन्तर्गत रहेको सूचना पहुँच केन्द्रले शिक्षकहरूलाई प्रविधिमैत्री बनाउन तालिम दिन थालेको हो।

केन्द्रका कोअर्डिनेटर प्रदीप ढोडारीका अनुसार हालसम्म काठमाडौँको चन्द्रागिरी नगरपालिकाका सामुदायिक विद्यालयमा अध्यापनरत २३ जना र टोखा नगरपालिकाका १९ जना विज्ञान शिक्षकहरूलाई तालिम दिइसकिएको छ। पूर्णकालीन रूपमा सञ्चालन हुने यो तालिम हाल परीक्षणका रूपमा अघि बढाइएको छ।

तालिममा शिक्षकहरूलाई च्याटजीपीटी, जेमिनाई, डिपसिक जस्ता एआई टुलहरूको प्रयोग गर्न सिकाइन्छ। यसका माध्यमबाट शैक्षिक सामग्री निर्माण गर्ने, परियोजना प्रतिवेदनहरू बनाउने, र नमुना प्रश्नपत्र तयार पार्ने जस्ता व्यावहारिक सीपहरू प्रदान गरिने ढोडारीले जानकारी दिए।

कोअर्डिनेटर ढोडारीले भने, ‘आधुनिक विद्यालय शिक्षामा एआईका विभिन्न टुलहरूलाई कसरी प्रयोग गर्ने, आजको सूचना प्रविधिको विकाससँगै हाम्रो कक्षागत सिकाइलाई कसरी अझ प्रभावकारी र जीवनोपयोगी बनाउने भन्ने सन्दर्भमा तालिम केन्द्रित छ।’

नास्टले अब यो तालिम क्रमशः अन्य नगरपालिकाहरूमा पनि विस्तार गर्ने योजना बनाएको छ। आगामी दिनमा तालिमको निश्चित ढाँचा तयार पारी यसलाई देशभरका शिक्षकहरूसम्म पुर्‍याउने लक्ष्य राखिएको छ।

हाल यस तालिममा माध्यमिक तहका कम्प्युटर विज्ञान पुस्तकका लेखकहरू सुनिल घर्ती, राहुल महथा तथा अनुप पौड्यालले स्रोत व्यक्तिका रूपमा सहजीकरण गरिरहेका छन्।