काठमाडौं । अभिनेत्री साम्राज्ञी शाहले आफ्नो जन्मदिनको अवसर पारेर फ्यानहरूलाई सप्राइज दिइन्, इन्स्टाग्राममा इन्गेजमेन्टका तस्बिर सेयर गरेर। पछिल्लो समय अभिनय गरेको फिल्म ‘लण्डन टु पेरिस’ फ्लप भएपछि उनको सक्रियता घटेको थियो। यही मेसोमा प्रेमी विशाल खरेलसँग विवाह गरिहाल्ने मुडमा देखिइन् साम्राज्ञी।

एक दशकअघि अनमोल केसीसँग फिल्म ‘ड्रिम्स’मार्फत अभिनेत्रीका रूपमा डेब्यु गरेकी साम्राज्ञी पहिलो फिल्मबाटै चर्चामा आएकी थिइन्। त्यसपछि उनले ‘ए मेरो हजुर २’,‘तिमीसँग’,‘कायरा’, ‘मारूनी’,‘लण्डन टु पेरिस’मा अभिनय गरिन्। जुन बक्सअफिसको व्यावसायिक रूपमा फ्लप भए।

त्यसपछि अहिले एक फिल्ममा अभिनय गरेर बसेकी साम्राज्ञीले विवाह गर्न लागेकी छन्। भलै, उनले विवाह गर्न लागेका विशालको पहिल्यै पत्नी रहेको भन्दै विवाद भइरहेको छ।

साम्राज्ञीपछि अर्की अभिनेत्री पूजा शर्माले पनि लगनगाँठो कस्ने मनशाय बनाएकी छन्। ६ वर्षदेखि युद्ध बानियासँग प्रेम सम्बन्धमा रहेकी पूजाले हालै आफू विवाहको तयारीमा रहेको खबर शेयर गरिन्।

यही मङ्सिर २९ गते भक्तपुरको साँगामा रहेको होटेल फर्च्युनमा दुवै पक्षका सीमित पारिवारिक सदस्य र फिल्मकर्मीको उपस्थितिमा उनको विवाह हुने भएको छ।

करिअरको कुरा गर्दा साम्राज्ञीकै हालत छ, पूजाको पनि। ‘प्रेमगीत’ पछिका केही फिल्ममा उनको स्टारडम देखियो। तर, त्यसपछि रिलिज भएका ‘सम्झना विर्सना’, ‘सम्हालिन्छ कहिले मन’ र ‘दाम्भी’ले पूजालाई फ्लप फिल्ममा ह्याट्रिकको शृंखला पूरा गरिदिए। त्यसमा पनि ‘‘रावायण’को त कुरै गर्नु परेन।

लगातार फिल्म फ्लप भएपछी आफूले ६ महिना विश्राम लिने योजना अनुरूप नै ‘रावायण’ पछि फिल्म नगरेको पूजाले सुनाइन्। उनले भनिन्, ‘मेरो लगातार फिल्महरू आइरहेको थियो। त्यसैले ६ महिना ‘ब्रेक’ लिने योजना बनाएको थिएँ। अहिले मेरो साढे सातको दशा चलिरहेको रहेछ। बैशाखदेखि त्यो दशा सकिन्छ। त्यसपछि म राम्रोसँग आफ्नो ट्रयाकमा हिँड्छु।’

पछिल्लो समय फिल्म ‘३६ को आँकडा’मा अभिनय गरेकी छन् भने ‘एक्का तीन’को छायांकनको समेत तयारीमा छिन्। अहिले भने उनले एक्कासि बिहेको मुड बनाइन्।