विराटनगर। सहरी विकासमन्त्री कुलमान घिसिङले कोसी अस्पतालको निर्माणाधीन भवनको निरीक्षण गरेका छन्। सहरी विकास मन्त्रालय मातहतको संघीय सहरी विकास तथा भवन निर्माण कार्यालय मोरङमार्फत ७५९ शय्याको दुईवटा भवन निर्माणाधीन छन्।

मन्त्री घिसिङले निर्माणाधीन भवनको स्थलगत निरीक्षण गरी आयोजना व्यवस्थापन, अस्पताल प्रशासन र निर्माण व्यवसायीसँग छलफल गरेको उनको सचिवालयले जनाएको छ। जनताको स्वास्थ्यसँग प्रत्यक्ष जोडिएको अस्पतालको भौतिक संरचना निर्माण प्रगति अपेक्षाकृत हुन नसकेकाले जनशक्ति थप गरी तीन सिफ्टमा काम गर्न र गुणस्तरमा विशेष ध्यान दिन सम्बन्धित पक्षलाई घिसिङले निर्देशन दिए।

उनले निर्माणकार्यको नियमित अनुगमन गर्ने र काममा लापरबाही गरेको फेला परेमा जिम्मेवार सबैलाई कारबाही गर्नेसमेत चेतावनी दिए। अस्पताल प्रशासनका तर्फबाट भवन तयार नहुँदा स्वास्थ्य सेवा प्रवाह गर्न कठिनाइ भइरहेकाले निर्माणमा विशेष ध्यान दिन मन्त्रीसमक्ष अनुरोध गरिएको थियो।

कोसी अस्पतालको ५०० शय्याको मेडिकल भवन निर्माणको भौतिक प्रगति ३५ प्रतिशत छ। भवन निर्माणका लागि पुस २०७९ मा दुई अर्ब ४६ करोड रुपैयाँमा ठेक्का सम्झौता भएको थियो। ३६ महिनाभित्र निर्माण सक्ने गरी भएको ठेक्का सम्झौताको म्याद आगामी १२ पुसमा सकिँदै छ। निर्माण व्यवसायीलाई ७४ करोड ९८ लाख रुपैयाँ भुक्तानी भएको छ।

यसैगरी आईसीयू, सर्जिकल, न्यूरो सेवा उपलब्ध गराउन २५९ शय्याको भवन निर्माणका लागि असार २०७८ मा रमण-भूमि-बीआईपीएल जेभीसँग ठेक्का सम्झौता भएको थियो।

भवन निर्माणको भौतिक प्रगति ५० प्रतिशत छ। म्याद थपसहित सम्झौताको म्याद गत कात्तिकमै सकिएको छ। निर्माण व्यवसायीले ठेक्का सम्झौताको म्याद थप गर्न निवेदन पेस गरेको छ। ठेक्का सम्झौता रकम ३८ करोड ८७ लाख रुपैयाँ छ। निर्माण व्यवसायीलाई १६ करोड ३१ लाख भुक्तानी भएको छ।