काठमाडौँ- युवा कवि ऋजन मायालुको कविता सङ्ग्रह ‘घुम्ती विक्रीमा छ’ लोकार्पण भएको छ । शनिबार काठमाडौँको लेखन कुञ्जमा वरिष्ठ कवि भुवनहरि सिग्देलको सभापतित्वमा आयोजित कार्यक्रममा कवि सिग्देल, समीक्षकहरू डा. अशोक थापा र प्रेमिला राईले मायालुको उक्त कृति सार्वजनिक गरेका हुन्।

कृतिमाथि आफ्नो धारणा राख्दै समीक्षक प्रेमिला राइलाईले मायालुका कवितामा खस्कँदो मानवीय मूल्यप्रतिको आक्रोश र मानवताको वकालत मुखर अभिव्यक्त भएको बताइन्। साथै, उनले मायालुका कवितामा प्रेम, प्रकृति, युवा वयका उछ्वास र स्थानीय समस्याहरू समेटिएको उल्लेख गरिन् ।

अर्का समीक्षक डा. अशोक थापाले पूर्वी पहाड, विशेष गरी इलाम र त्यहाँको जनजातीय परिवेशबाट टिपिएका स्थानीय विम्बहरूको बाहुल्य मायालुका कविताको प्रमुख विशेषता भएको बताए। उनले भने, ‘इलामका पहाडी जनजीवन, नदीनाला, प्रकृति र संस्कृतिका विम्बहरूको संयोजनले मायालुलाई एक काबिल कविको रूपमा प्रस्तुत गरेको छ।’

सभालाई सम्बोधन गर्दै मायालुले आफ्नो कविता यात्राको स्मरण सुनाए। उनले आफ्नो कवितामा प्रेम र जीवन मूल विषय भएर आउने गरेको बताए।

सभापति सिग्देलले पुस्तकमा समेटिएको इलाम र त्यस वरिपरिको परिवेश र संस्कृतिको विवेचना गर्दै त्यस समृद्ध भूगोल र सांस्कृतिक परिवेशले मायालुको कवितामा ऊर्जा र निखार थपेको टिप्पणी गरे। कृति पेज टर्नरले प्रकाशन गरेको हो।

यसअघि मायालुको एकल कवितासङ्ग्रह ‘चुचुरो र स्वास्नी मान्छे’ र संयुक्त कवितासङ्ग्रह ‘उज्यालोका मालीहरू’ प्रकाशित छ ।