राजधानी राष्ट्रिय दैनिक (लोकप्रिय राष्ट्रिय दैनिक)
ओस्कार अवार्डको पहिलो चरणमा ‘अञ्जिला’ सहित ८६ चलचित्र
काठमाडौं । ९८ औं संस्करणको ओस्कार एकेडेमी अवार्ड २०२६ को लागि सर्वश्रेष्ठ अन्तर्राष्ट्रिय फिचर चलचित्रको प्रथम चयन सूची आयोजक टिमले सार्वजनिक गरेको छ । जसमा नेपालबाट मिलन चाम्स निर्देशित एवम् प्रेमकुमार श्रेष्ठ निर्मित चलचित्र ‘अञ्जिला’ आधिकारिक रूपमा प्रथम सूचीमा चयन भएको छ ।
ओस्कारको आयोजक संस्था एकेडेमी अफ मोशन पिक्चर आट्र्स एन्ड साइन्सेस (एम्पास) ले सन १९५६ मा यो पुरस्कार स्थापना गरेको थियो । त्यस अघि हलिउड (संयुक्त राज्य अमेरिका)मा मात्र बनेका चलचित्रहरूले यो अवार्डमा भाग लिन पाउँथे । सोही क्रममा एउटा विदेशी चलचित्रको विधा समेत थपेर यसलाई राष्ट्रियबाट विदेशी करण गर्ने एम्पासको निर्णय स्वरूप सन १९५६ मा सर्वश्रेष्ठ विदेशी फिचर चलचित्रको विद्या सिर्जना गरिएको थियो । त्यसपछिबाट हरेक वर्ष विभिन्न देशका चलचित्र उद्योगका सर्वश्रेष्ठ चलचित्रलाई ओस्कारले विदेशी फिचर चलचित्रको लागि समावेश गराउँदै आएको छ । तर विदेशी शब्द प्रति निकै टिका टिप्पणी हुन थालेपछि सन २०१९ बाट ओस्कारले विदेशी भन्ने शब्द हटाएर अन्तर्राष्ट्रिय फिचर चलचित्रको रूपमा अवार्डको नामांकन गरेको हो ।
यो अवार्डको लागि एकेडेमीद्वारा संयुक्त राज्य अमेरिका बाहिर उत्पादन गरिएको फिचर लम्बाइका चलचित्रलाई वार्षिक रूपमा सहभागिताको लागि आह्वान गरिन्छ । जसमा मुख्यतया गैह्र अंग्रेजी संवादहरू समावेश भएको हुन पर्ने नियम छ । विगत झैँ यस पटक पनि यो अवार्डको लागि सहभागी हुन पटक १ अक्टोबर २०२४ देखि ३० सेप्टेम्बर २०२५ सम्म सम्बन्धित देशका चलचित्र घरहरूमा रिलिज भएर कम्तीमा सात दिन प्रदर्शन भएका चलचित्रहरूलाई आह्वान गरिएको थियो ।
ओस्कारले हरेक देशमा त्यो देशबाट चयन गरेर एउटा चलचित्र पठाउन ओस्कारको लागि चलचित्र चयन समिति गठन गरेको छ । निर्देशक विमल पौडेलको अध्यक्षमा नेपालमा रहेको ओस्कारको लागि नेपाली चलचित्र चयन समितिले मिलन चाम्स निर्देशित नेपाली चलचित्र ‘अञ्जली’लाई चयन गरेर पठाएको थियो ।
सोही क्रममा गत असोजमा चलचित्र ‘गुन्यु चोलो’की निर्देशक समुन्द्र भट्ट, अभिनेता नाजिर हुसेन लगायतले काठमाडौँमा पत्रकार सम्मेलन गरेर ‘अञ्जिला’ भन्दा आफ्नो चलचित्र ‘गुन्यु चोलो’ राम्रो भएको दाबी समेत गरे । त्यसैले ‘अञ्जिला’लाई रद्ध गरेर ‘गुन्यु चोलो’ नै ओस्कारमा समावेश गर्नु पर्ने भन्दै ओस्कारको आयोजक टिमलाई इमेल समेत पठायो । तर ओस्कारको आधिकारिक टिमले चयन गरेर पठाएको चलचित्र नै आफूहरूलाई मान्य हुने जवाफ ओस्कारको आयोजक टिमले दियो । यसरी नेपालको ओस्कारका लागि चलचित्र चयन टिमले गत २ अक्टोबरमा नेपालबाट चयन गरेर पठाएको चलचित्र ‘अञ्जिला’ लाई नै अन्तर्राष्ट्रिय फिचर चलचित्र चयन कार्यकारी समितिले सबै प्रक्रियाको निरीक्षण पछि चयन ग¥यो । फलस्वरूप नेपालबाट ९८ औँ ओस्कार अवार्डको लागि प्रारम्भिक चयनमा चलचित्र ‘अञ्जिला’ परेको छ ।
त्यसो त ९८ औँ ओस्कार अवार्डको लागि गत २ अक्टोबर २०२५मा कुल ९२ देशहरूले आफ्ना चलचित्रहरू पेस गरेका थिए । ती ९२ देशका चलचित्र मध्य अन्तर्राष्ट्रिय फिचर चलचित्र विद्याको लागि एकेडेमी अफ मोशन पिक्चर आट्र्स एन्ड साइन्सेस (एम्पास) ले ८६ देशका ८६ वटालाई पहिलो सूचीमा चयन गरेको छ । ८६ भित्र नेपाल पनि परेको छ ।
अन्तर्राष्ट्रिय फिचर चलचित्र विद्याका लागि मेडागास्कर र पपुवा न्यु गिनीको पहिलो पटक सम्बन्धित चलचित्र पेस भए । हैटीले आफ्नो देशको चलचित्र राम्रो नभएको भन्दै पठाउन सकेन । यस्तै ग्रीनल्याण्डले २०१२ पछि पहिलो पटक यो विद्याको लागि आफ्नो देशबाट चलचित्र प्रस्तुत गरेको छ ।
यसरी यो विद्याको अवार्डको लागि पहिलो चरणमा समावेश ९२ देश मध्य ६ वटा देश पपुवा न्यु गिनी, काजकिस्तान, कम्वोडिया, सेनेगल, काजक्स्थान र थाइल्यान्ड प्रथम चरणबाटै बाहिरिएका छन् । यसरी प्रथम चरणमा यति बेला चयन भएका ८६ देशका चलचित्र मध्य दोस्रो चरणमा विभिन्न १५ देशका १५ चलचित्र मात्र सेमी फाइनलका रूपमा पर्ने छन् । सेमी फाइनलको सूची ओस्कार आयोजक टिमले आगामी १६ डिसेम्बर २०२५ मा घोषणा गर्ने छ । यी उत्कृष्ट १५ चलचित्रबाट निर्णायकको चयनको आधारमा फाइनल सूचीको रूपमा उत्कृष्ट पाँच चलचित्रको मनोनयन आगामी २२ जनवरी २०२६ सार्वजनिक गरिने छ । जस मध्यबाट १५ मार्च २०२६ आइतबार हुने ओस्कारको ग्रान्ड फिनाले समारोहमा सर्वोत्कृष्ट अन्तर्राष्ट्रिय चलचित्रको ओस्कार अवार्ड प्रदान गरिने छ ।
The post ओस्कार अवार्डको पहिलो चरणमा ‘अञ्जिला’ सहित ८६ चलचित्र appeared first on राजधानी राष्ट्रिय दैनिक (लोकप्रिय राष्ट्रिय दैनिक)-RajdhaniDaily.com - Online Nepali News Portal-Latest Nepali Online News portal of Nepali Polities, economics, news, top stories, national, international, politics, sports, business, finance, entertainment, photo-gallery, audio, video and more....
