काठमाडौँ- नेकपा एमाले ललितपुरको प्रतिनिधिमा अध्यक्ष केपी शर्मा ओली पक्षको वर्चस्व देखिएको छ। महाधिवेशन प्रतिनिधि छनोटका लागि शनिबार सम्पन्न निर्वाचनमा निर्वाचितमध्ये अधिकांश  ओली पक्षका रहेको जिल्लाका एक नेताले बताए।

क्षेत्र नं. १ खुलातर्फ मधुसूदन पौडेल र चेतनाथ सञ्जेल छनोट भएका छन्। यसैगरी महिलातर्फ कमला तामाङ र तारा सञ्जेल तथा युवातर्फ विक्रम घिमिरे निर्वाचित भएको जिल्ला अध्यक्ष पुरुषोत्तम आचार्यले बताए।  पौडेल र सञ्जेल ओली पक्षका हुन्। यसैगरी तामाङ र घिमिरे ओली पक्षका मानिन्छन्। सञ्जेलचाहिँ ओली इतर पक्षकी हुन्।

क्षेत्र नं. २ मा खुलातर्फ रामहरि बजगाईं र अष्टवीर व्यञ्जनकार, महिलातर्फ देविका राई र युवातर्फ सुजित बस्नेत चयन भए। बजगाईँ ओली पक्षका हुन्। व्यञ्जनकार र राई इतर पक्षका हुन् भने बस्नेत ओली पक्षका हुन्।

क्षेत्र नं. ३ खुलातर्फ प्रेमभक्त महर्जन र रघुनाथ महर्जन, महिलातर्फ सुकुमाया लामा र युवातर्फ ज्ञानभक्त डंगोल छनोट भएका छन्। महर्जनद्वय ओली पक्षका हुन्।  लामा खुलेकी छैनन् भने डंगोल ओली पक्षका हुन्। दलित कोटामा प्रदीप रम्तेल निर्विरोध निर्वाचित भएको एमाले ललितपुरले जनाएको छ। जिल्लाका एक नेताका अनुसार निर्वाचित प्रतिनिधि अधिकांश ओली पक्षीय छन्।

आचार्यले शान्तिपूर्ण रूपमा सम्पन्न प्रतिनिधि चयन भएको बताए।