काठमाडाैं । नेपालमा गुगल वर्कस्पेसको अधिकृत प्रत्यक्ष रिसेलरका रूपमा कार्यरत टेलि डिजिटल सर्भिसेस प्रा.लि.ले अनधिकृत गुगल वर्कस्पेस सदस्यतासँग सम्बन्धित खाता निलम्बनका घटनाहरू बढ्दै गएपछि देशभरका संस्थालाई तत्काल सतर्कता अपनाउन आग्रह गरेको छ ।

कम्पनीका अनुसार अधिकृत संरचनाबाहिर सञ्चालन हुने विक्रेतामार्फत अनजानेमा सदस्यता खरिद गरेका धेरै व्यवसायले अचानक सेवा अवरोध, इमेल तथा साझा ड्राइभमा पहुँच प्रतिबन्ध र गम्भीर सञ्चालन अवरोधको सामना गरिरहेका छन् । केही अवस्थामा पूर्वसूचना नै नदिई कारबाही प्रक्रिया अघि बढेको पाइएको छ ।

नेपालका लागि गुगल वर्कस्पेसको आधिकारिक सूचीबद्ध दर प्रति प्रयोगकर्ता प्रति महिना अमेरिकी डलर ७ रहेको छ । प्रति प्रयोगकर्ता प्रति महिना अमेरिकी डलर ७ भन्दा कम मूल्यमा उपलब्ध गराइने सदस्यतालाई गम्भीर चेतावनी संकेतका रूपमा लिनुपर्ने कम्पनीले जनाएको छ । यस्तो दरले सदस्यता गुगलको स्वीकृत लाइसेन्स तथा वितरण संरचनाअन्तर्गत नहुन सक्ने संकेत गर्ने बताइएको छ ।

केही अवस्थामा शिक्षा प्रयोजनका लागि मात्र मान्य योजना गैर–शैक्षिक संस्थाहरूलाई छुट दरमा उपलब्ध गराइएको भेटिएको छ। यस्तो व्यवस्था गुगलको लाइसेन्स नीतिअनुरूप नहुन सक्ने र यसले कारबाहीको जोखिम उल्लेखनीय रूपमा बढाउने कम्पनीको भनाइ छ ।

धेरै व्यवसायहरूले जानाजानी नीति उल्लङ्घन नगरेको भए पनि परिणाम भने समान रूपमा गम्भीर हुन सक्ने चेतावनी दिइएको छ। गुगल क्लाउडका सेवा सर्तहरूको उल्लङ्घन भएमा खाता निलम्बन तथा सम्भावित डाटा गुम्ने जोखिम उत्पन्न हुन सक्छ । एकपटक कारबाही लागू भएपछि व्यवसाय निरन्तरता तुरुन्त प्रभावित हुने देखिएको छ ।

कम्पनीका व्यवसाय तथा मार्केटिङ प्रमुख निखिल खेराडीले प्रभावित सबै व्यवसायहरूले गलत नियतले सदस्यता नलिएको उल्लेख गर्दै पर्याप्त जानकारीको अभावमा यस्तो अवस्था सिर्जना भएको बताए । उनले संस्थाहरूलाई आफ्नो वर्कस्पेस सदस्यता तुरुन्त परीक्षण गरी वैध सदस्यतामा सहज स्थानान्तरण गर्न आग्रह गरे । उनका अनुसार कम्पनीको टोली हालको अवस्था मूल्यांकन, वैध सदस्यतामा रूपान्तरण तथा सञ्चालनसम्बन्धी जोखिम न्यूनीकरणमा पूर्ण रूपमा सक्षम रहेको छ ।

कम्पनीले आफू नेपालमा गुगल वर्कस्पेस सदस्यता बिक्री, स्थापना तथा प्राविधिक सहयोग प्रदान गर्न आधिकारिक रूपमा प्रमाणित संस्था भएको पुष्टि गरेको छ । वित्तीय सेवा, शिक्षा, स्वास्थ्य सेवा, खुद्रा व्यापार तथा व्यावसायिक सेवा क्षेत्रका ६० भन्दा बढी ग्राहकलाई सेवा प्रदान गरिसकेको कम्पनीले जनाएको छ, जसमा नियमअनुरूप कार्यान्वयन र दीर्घकालीन खाता व्यवस्थापन समावेश छन्।

प्रमुख कार्यकारी अधिकृत नवांकुर सूदले टेलि डिजिटल सर्भिसेसको जिम्मेवारी केवल वर्कस्पेस लाइसेन्स बिक्रीमा सीमित नभएको उल्लेख गर्दै नेपाली व्यवसायहरूको डिजिटल भविष्य सुरक्षित बनाउने दीर्घकालीन प्रतिबद्धता दोहोर्याए। उनका अनुसार अनधिकृत योजनाका कारण देखिएको वर्तमान सञ्चालन संकट टार्न सकिने विषय थियो र भविष्यमा यस्ता कमजोरी दोहोरिन नदिन कम्पनी गम्भीर रूपमा लागिपरेको छ ।

तत्काल उपलब्ध सेवामा खाता निलम्बन मूल्यांकन, सहज स्थानान्तरण सहयोग, नियमअनुरूपता समीक्षा, निरन्तर प्राविधिक सहयोग तथा खाता व्यवस्थापन लगाएको छ । हालप्रति प्रयोगकर्ता प्रति महिना अमेरिकी डलर ७ भन्दा कम दरमा गुगल वर्कस्पेस सदस्यता प्रयोग गरिरहेका वा आफ्नो सदस्यताको स्रोतबारे अनिश्चित रहेका संस्थाहरूलाई व्यवसाय निरन्तरता सुरक्षित राख्न ढिलाइ नगरी सत्यापन गर्न कडा सिफारिस गरिएको छ ।

काठमाडौं । विश्वप्रसिद्ध प्रविधि कम्पनी शाओमीले आफ्ना ग्राहकलाई सहज, छिटो र भरपर्दो सेवा उपलब्ध गराउने उद्देश्यसहित सेवा विस्तारलाई निरन्तरता दिएको छ ।

कम्पनीले आदर्शनगर, वीरगन्ज तथा अर्विट मल, शिवचोक, जनकपुरमा दुई आधिकारिक सर्भिस सेन्टर सञ्चालनमा ल्याएको हो ।

यी सर्भिस सेन्टरहरू सञ्चालनमा आएसँगै मधेस प्रदेशका शाओमी प्रयोगकर्ताहरूले अब आफ्नै क्षेत्रमा आधिकारिक गुणस्तरीय सेवा प्राप्त गर्न सक्नेछन् । कम्पनीका अनुसार यस विस्तारले ग्राहकको सन्तुष्टि अझ सुदृढ हुने विश्वास लिइएको छ ।

नयाँ सर्भिस सेन्टरमार्फत शाओमीका स्मार्टफोन, वेअरएबल्स (स्मार्टवाच तथा फिटनेस ब्यान्ड), हियरएबल्स (इयरफोन तथा हेडफोन) र विभिन्न आइओटी उपकरणहरूको मर्मत, प्राविधिक जाँच तथा सेवा उपलब्ध गराइनेछ । यहाँ प्रयोग हुने सबै स्पेयर पार्ट्स आधिकारिक (जेनुइन) हुनेछन् ।

यी सर्भिस सेन्टरहरूको सञ्चालन टेलिडाइरेक्टर प्रा.लि.ले गर्नेछ । टेलिडाइरेक्ट, रमेश कर्पअन्तर्गतको कम्पनी हो, जसले नेपालभर शाओमी ब्रान्डका लागि आधिकारिक सेवा व्यवस्थापन गर्दै आएको छ र ग्राहकमाझ विश्वासिलो सेवा प्रदायकका रुपमा स्थापित छ । उद्घाटनको अवसरमा कम्पनीले विशेष अफरसमेत घोषणा गरेको छ ।

सञ्चालनमा आएको मितिदेखि एक महिनासम्म ग्राहकहरूले सबै उपकरणमा निःशुल्क सभिर्सिङ तथा सफ्टवेयर अपग्रेड सेवा पाउनेछन् । साथै वारिन्टीबाहिर रहेका स्पेयर पाट्र्स र मर्मत सेवामा २५ प्रतिशतसम्म छुट तथा वारिन्टीबाहिरका स्पेयर पाट्र्समा कुनै सर्भिस शुल्क नलाग्ने सुविधा उपलब्ध गराइने पनि कम्पनीले जनाएको छ ।

दुवै सर्भिस सेन्टरमा दक्ष तथा तालिमप्राप्त प्राविधिक टोली रहनेछ, जसले सामान्य मर्मतदेखि जटिल प्राविधिक समस्यासम्म आधिकारिक र मापदण्डअनुसारको सेवा प्रदान गर्नेछन् ।

वीरगञ्ज (पर्सा) । वीरगञ्ज नाका हुँदै चालु आर्थिक वर्षको सात महिनामा रु पाँच खर्ब १९ अर्ब एक करोड मूल्य बराबरका वस्तु तथा सामान आयात गरिएको छ । गत आर्थिक वर्षको सोही अवधिको तुलनामा चालु आवमा रु ५७ अर्ब ३१ करोड अर्थात् १२ प्रतिशत बढी सामान आयात भएको हो ।

वीरगञ्ज भन्सार कार्यालयका सूचना अधिकारी उदयसिंह विष्टले चालु आवमा आयातमा उल्लेखनीय वृद्धि भएको बताए । “चालु आवमा पेट्रोलियम पदार्थ र फलाम तथा फलामबाट बनेका सामानहरुको आयातको हिस्सा बढी देखिन्छ,” उनले भने । गत आवको सात महिनामा रु चार खर्ब ६० अर्ब २३ करोड मूल्य बराबरका सामान आयात भएको थियो ।

चालु आवको सात महिनामा रु एक खर्ब छ अर्ब ४३ करोड मूल्य पर्ने पेट्रोलियम पदार्थको आयात गरिएको छ । त्यसैगरी, रु ४६ अर्ब १६ करोड मूल्य पर्ने फलाम तथा फलामबाट बनेका सामानहरुको आयात गरिएको छ । सोही अवधिमा रु ३५ अर्ब ८७ करोड मूल्य पर्ने मेसिनरी तथा पार्टपुर्जा आयात गरिएको छ । रु ३५ अर्ब ६७ करोड मूल्य पर्ने भटमासको कच्चा तेल आयात भएको जनाइएको छ । रु २७ अर्ब ९८ करोड मूल्य पर्ने इलेक्ट्रिक मेसिनरी, उपकरण र तिनका पार्टपुर्जाको आयात गरिएको भन्सार कार्यालयले जनाएको छ ।