काठमाडौं । सरकारको राजस्व संकलनमा खासै सुधार देखिएको छैन। चालु आर्थिक वर्ष २०८२।८३ को पहिलो ६ महिना पुससम्मको तथ्यांकले यस्तो देखाएको हो।

अर्थ मन्त्रालयले सार्वजनिक गरेको तथ्यांकअनुसार चालु वर्षको पुससम्म सरकारले ५ खर्ब ८१ अर्ब ४१ करोड रुपैयाँ राजस्व संकलन गरेको छ। जुन सरकारको वार्षिक लक्ष्यको ३९.२८ प्रतिशत र पुस मसान्तसम्मको ८१.७५ प्रतिशत हो। सरकारले वार्षिक लक्ष्य १४ खर्ब ८० अर्ब रुपैयाँ र पुस मसान्तसम्म ७ खर्ब ११ अर्ब २१ करोड रुपैयाँराजस्व संकलन गर्ने लक्ष्य राखेको थियो।

गत आर्थिक वर्ष २०८१।८२ को पुससम्म सरकारले ५ खर्ब ६७ अर्ब ४० करोड रुपैयाँ राजस्व संकलन गरेको छ। जुन सरकारको वार्षिक लक्ष्यको ३९.९८ प्रतिशत र पुस मसान्तसम्मको ८४.३३ प्रतिशत हो। सरकारले वार्षिक लक्ष्य १४ खर्ब १९ अर्ब ३० करोड रुपैयाँ र पुस मसान्तसम्म ६ खर्ब ७२ अर्ब ८१ करोड रुपैयाँराजस्व संकलन गर्ने लक्ष्य राखेको थियो।

यस हिसाबले गत वर्षको तुलनामा समीक्षा अवधिमा सरकारको राजस्व संकलनमा खासै सुधार नदेखिएको हो।

चालु वर्ष पुसमा सरकारले १ खर्ब ९० अर्ब ७७ करोड रुपैयाँ राजस्व संकलन गर्ने लक्ष्य राखेको थियो। सरकारले पुसमा १ खर्ब ७१ अर्ब ६३ करोड रुपैयाँ राजस्व संकलन गरेको छ। जुन लक्ष्यको ८९.९६ प्रतिशत हो।