आगामी फागुन २१ गते हुने प्रतिनिधिसभा निर्वाचनका लागि खुलाइएको निर्वाचन प्रहरी भर्नाको म्याद दुई दिन थप गरिएको छ । अपेक्षित संख्यामा आवेदन नपरेपछि गृहमन्त्रालयको निर्देशनअनुसार भर्ना प्रक्रिया माघ ३ गतेसम्म लम्ब्याइएको हो ।

यसअघि पुस २४ गते सूचना प्रकाशित गरी पुस २५ गतेदेखि माघ १ गतेसम्म दरखास्त लिने व्यवस्था गरिएको थियो । तर आवेदन संख्या कम भएपछि समय थप्नुपरेको जिल्ला प्रहरी कार्यालय स्याङ्जा निर्वाचन सेल प्रमुख प्रहरी निरीक्षक कमल नेपालीले जानकारी दिए । उनका अनुसार बिहीबार दिउँसोसम्म नेपाल प्रहरीतर्फबाट एक हजार १८ जनाले आवेदन दिएका छन् । स्याङ्जामा कुल २ हजार १२६ जना निर्वाचन प्रहरी भर्ना गरिनेछ ।

यसपालि निर्वाचन सुरक्षामा खटाइने सुरक्षाकर्मीलाई ‘म्यादी प्रहरी’को सट्टा ‘निर्वाचन प्रहरी’ नाम दिइएको छ । निर्वाचन प्रहरी भर्ना, छनोट, नियुक्ति तथा परिचालनसम्बन्धी एकीकृत (नेपाल प्रहरी तथा सशस्त्र प्रहरी बल नेपाल) कार्यविधि २०८२ अनुसार भर्ना प्रक्रिया चलिरहेको प्रहरी निरीक्षक नेपालीले बताए ।

जिल्ला प्रहरी कार्यालय स्याङ्जा, वडा प्रहरी कार्यालय वालिङ, इलाका प्रहरी कार्यालय चापाकोट र सशस्त्र प्रहरी बल नेपाल नं ३० गुल्म हेडक्वाटर वालिङबाट फारम वितरण भइरहेको छ । फारम वितरण हुने स्थानमै बुझाउन सकिने व्यवस्था गरिएको जिल्ला प्रहरी कार्यालय स्याङ्जाका प्रहरी नायब उपरीक्षक प्रसन्न राज चौधरीले बताए । १८ वर्ष पूरा भई ५४ वर्ष ननाघेका नेपाली नागरिकले आवेदन दिन सक्नेछन् ।

निर्वाचन प्रहरी बन्न साधारण लेखपढ गर्न जान्ने, कुनै फौजदारी अभियोगमा सजाय नपाएको, भर्नाका समयमा राजनीतिक दलको सदस्य नभएको, साथै शारीरिक तथा मानसिक रूपमा स्वस्थ हुनुपर्ने सर्त तोकिएको छ । आतङ्ककारी वा विध्वंसात्मक गतिविधिमा संलग्न नरहेको हुनुपर्ने व्यवस्था पनि छ ।

भर्नामा नेपाली सेना, नेपाल प्रहरी, सशस्त्र प्रहरी बल नेपाल, विदेशी मित्र राष्ट्रका सुरक्षा निकायबाट सेवा निवृत्त पूर्वसुरक्षाकर्मी तथा वन रक्षकबाट सेवा निवृत्त पूर्वसुरक्षाकर्मी साथै २०८१ माघ १ देखि २०८२ पुस मसान्तसम्म नेपाली सेना, नेपाल प्रहरी तथा सशस्त्र प्रहरी बल नेपालमा विभिन्न पदमा भर्नाको लागि आवेदन दिई शारीरिक तन्दुरुस्ती र स्वास्थ्य परीक्षणमा उत्तीर्ण भएकालाई प्रवेश पत्रका आधारमा प्राथमिकता दिइनेछ । यसअघि भएका प्रतिनिधिसभा, प्रदेशसभा र स्थानीय तह निर्वाचनमा म्यादी प्रहरीका रूपमा सन्तोषजनक काम गरेका व्यक्तिलाई पनि प्राथमिकतामा राखिएको छ ।

निर्वाचन प्रहरीका लागि आवेदन निःशुल्क गरिएको छ । छनोटमा परेका निर्वाचन प्रहरीलाई माघ १५ देखि २४ गतेसम्म तालिम तथा प्रशिक्षण दिइनेछ । माघ ३ गतेसम्म आवेदन दिनेहरूको सम्पर्क मिति माघ ४ गते तोकिएको छ ।

नियुक्ति पाएपछि निर्वाचन प्रहरीले ४० दिनसम्म काम गर्नुपर्नेछ । उनीहरूले प्रहरी जवानको प्रारम्भिक तलब स्केलअनुसार प्रतिदिन ८ सय ६९ रुपैयाँ ४० पैसाका दरले कुल ३४ हजार ७ सय ७६ रुपैयाँ पारिश्रमिक पाउनेछन् । साथै खाद्यान्न खर्च, आवतजावत तयारी खर्च र खाजा खर्चसमेत प्रदान गरिने व्यवस्था गरिएको छ ।

स्याङ्जाको आँधीखोला गाउँपालिकाले आयोजना गरेको छैटौँ राष्ट्रपति रनिङ शिल्ड–२०८२ खेलकुद प्रतियोगिताको उपाधि त्रि–शहिद माध्यमिक विद्यालयले हात पारेको छ ।

त्रि–शहिदले नौ स्वर्ण, छ रजत र आठ कास्य पदक जित्दै समग्र प्रतियोगिताको विजेता बनेको हो । उपाधिसँगै विद्यालयले ६० हजार रुपैयाँ नगद, रनिङ शिल्ड, कप, मेडल र प्रमाणपत्र प्राप्त गरेको छ । यसअघि भएका छ वटै संस्करणका प्रतियोगितामा जित हासिल गर्दै त्रि–शहिदले दोस्रो पटक रनिङ शिल्ड आफ्नो पोल्टामा पारेको हो ।

यहाँको वडा नं–६ स्थित शिम्ले खेलमैदानमा सम्पन्न प्रतियोगितामा पद्युम्न पनेरु माध्यमिक विद्यालयले नौ स्वर्ण, एक रजत र पाँच कास्य पदकसहित दोस्रो स्थान हासिल गर्दा श्रवण माध्यमिक विद्यालयले पाँच स्वर्ण, आठ रजत र तीन कास्य पदक जित्दै तेस्रो स्थानमा चित्त बुझाएको छ । दोस्रो हुने विद्यालयले ४० हजार र तेस्रो हुनेले २० हजार रुपैयाँ नगदसहित कप, मेडल र प्रमाणपत्र प्राप्त गरेका छन् ।

प्रतियोगिताका विजयी खेलाडी तथा विद्यालयलाई पुरस्कार वितरण गर्दै गाउँपालिका अध्यक्ष विश्वनाथ पौडेलले खेलकुदले विद्यार्थीको सर्वाङ्गीण विकासमा महत्त्वपूर्ण भूमिका खेल्ने बताए । “खेलकुदले अनुशासन, सहकार्य र नेतृत्व विकास गर्छ,” उनले भने, “पालिकाले खेलकुदमैत्री वातावरण बनाउँदै आगामी दिनमा यस्ता प्रतियोगितालाई थप व्यवस्थित र व्यापक बनाउनेछ ।”

पुस २८ गतेदेखि सुरु भएको प्रतियोगितामा भलिबल, कबड्डी, लङजम्प, हाइजम्प, ट्रिपल जम्प, एथलेटिक्सलगायत विभिन्न खेल समावेश थिए । पालिकाभित्रका १२ विद्यालयका करिब नौ सय विद्यार्थी सहभागी प्रतियोगितामा ३० स्वर्ण, ३० रजत र ३० कास्य पदकका लागि प्रतिस्पर्धा गरिएको थियो ।

स्थानीय स्तरमै आयोजना गरिएको प्रतियोगिताले विद्यार्थी खेलाडीको प्रतिभा उजागर गर्नुका साथै विद्यालयबीच स्वस्थ प्रतिस्पर्धा बढाएको पद्युम्न पनेरु माध्यमिक विद्यालयकी शिक्षिका सर्मिला बस्यालले बताइन् ।

लागूऔषध मुद्दामा फरार रहेका दुई प्रतिवादीलाई प्रहरीले पक्राउ गरेको छ । पक्राउ पर्नेमा भीरकोट नगरपालिका–२ का ३२ वर्षीय मुकर खान भनिने सजित अलि मिया र गोरखा नगरपालिका–४ स्थायी ठेगाना भई हाल भीरकोट–१ बस्दै आएका २४ वर्षीय पेप्पे भनिने प्रविन अधिकारी रहेका छन् ।

वडा प्रहरी कार्यालय, बैदाम कास्कीमा लागूऔषध सम्बन्धी कसूरमा मुद्दा दर्ता भएका दुई प्रतिवादीलाई बुधबार दिउँसो भीरकोट–१ बयरघारी बजारबाट पक्राउ गरिएको प्रहरी नायब उपरीक्षक प्रसन्नराज चौधरीले जानकारी दिए ।

यसैबीच, प्रहरीले जेन–जेड आन्दोलनको क्रममा गत भदौ २४ गते कास्की कारागार कार्यालय, पोखराबाट फरार भएका एक कैदीलाई पनि पक्राउ गरेको छ । हाडनाता जबरजस्ती करणी मुद्दामा कारागार चलान भएका भीरकोट नगरपालिका–११ का ४० वर्षीय हिराबहादुर कुँवर पक्राउ परेका हुन् ।

आन्दोलनका बेला फरार भएका कुँवरलाई बुधबार उनकै घरबाट नियन्त्रणमा लिइएको डिएसपी चौधरीले बताए । पक्राउ परेकामाथि आवश्यक कानुनी प्रक्रिया अघि बढाइएको प्रहरीले जनाएको छ ।