काठमाडौँ । दैनिक करिब ५ हजार सवारी चालक अनुमतिपत्र (लाइसेन्स) को माग हुने गरेको छ । यातायात व्यवस्था विभागका अनुसार यसअघि आवेदन दिइसकेका करिब २५ लाख सेवाग्राहीलाई अझै लाइसेन्स वितरण गर्न बाँकी रहेको छ ।

विभागका महानिर्देशक राजीव पोखरेलले अत्यावश्यक परेका सेवाग्राहीलाई प्राथमिकतामा राखेर तत्काल लाइसेन्स उपलब्ध गराइरहेको जानकारी दिए । उनका अनुसार दैनिक करिब ६ सय जनाले ‘इमरजेन्सी’ भन्दै लाइसेन्सका लागि विभागमा निवेदन दिने गरेका छन् र सोही अनुपातमा वितरण भइरहेको छ ।

अनलाइन वा भौतिक रूपमा आवेदन दिएपछि सम्बन्धित विवरण सेक्युरिटी प्रिन्टिङ प्रेसमा पठाइने व्यवस्था छ । त्यहाँबाट ५ देखि ७ दिनभित्र लाइसेन्स छपाइ भई विभागमा आउने र त्यसपछि वितरण गरिने महानिर्देशक पोखरेलले बताए ।लाइसेन्स अभावको समस्या समाधान गर्न विभागले विभिन्न सहजीकरणका उपाय अवलम्बन गरेको उनको भनाइ छ ।

विभागले नागरिक एपमार्फत डिजिटल लाइसेन्स देखाउन सकिने व्यवस्था गरेको छ । ट्राफिक प्रहरीले पनि उक्त डिजिटल लाइसेन्सलाई मान्यता दिने गरेको छ । ट्राफिक नियम उल्लङ्घन भएमा सोही डिजिटल लाइसेन्सका आधारमा चिट काट्न तथा जरिवाना अनलाइनमार्फत भुक्तानी गर्न सकिने व्यवस्था मिलाइएको छ । यसले लाइसेन्स वा रसिद बोकेर हिँड्नुपर्ने बाध्यता हटाएको विभागको दाबी छ ।

जेन–जी आन्दोलनका क्रममा विभागमा आगलागी हुँदा करिब २ लाख ५० हजार लाइसेन्स जलेर नष्ट भएका थिए । संसद भवन नजिकै रहेकाले आन्दोलनको केन्द्रबिन्दुमा परेको विभागमा ठूलो क्षति पुगेको महानिर्देशक पोखरेलले उल्लेख गरे । विभाग पूर्ण रूपमा क्षतिग्रस्त भए पनि कर्मचारीको प्रयासबाट करिब ६० लाख ड्राइभिङ लाइसेन्सको डेटा पुनर्जीवित गर्न सफल भएको उनले जानकारी दिए ।

उनका अनुसार आन्दोलनका बेला लाइसेन्स प्रिन्ट गर्ने मेसिनसमेत जलेर नष्ट भएको थियो । उक्त मेसिन सञ्चालनमा आउन नसकेपछि बनेपास्थित सेक्युरिटी प्रिन्टिङ प्रेससँग सम्झौता गरी छपाइ कार्य अघि बढाइएको छ । पहिलो चरणमा १२ लाख लाइसेन्स छपाइ गरी उपलब्ध गराउने प्रक्रिया सुरु भएको र क्रमशः सबै सेवाग्राहीले लाइसेन्स पाउने व्यवस्था मिलाइने विभागको भनाइ छ ।

वैदेशिक रोजगारीमा जाने वा अन्य आपतकालीन प्रयोजनका लागि लाइसेन्स आवश्यक परेकाले विभागमा निवेदन दिएपछि प्राथमिकताका आधारमा उपलब्ध गराइँदै आएको छ । हाल डिजिटल प्रणालीको प्रयोग बढेसँगै लाइसेन्ससम्बन्धी समस्या पहिलेको जस्तो जटिल नरहेको महानिर्देशक पोखरेलले बताए ।

काठमाडाैँ । पृथ्वी राजमार्ग अन्तर्गत आँबुखैरेनी–जामुने सडकको स्तरोन्नतिको काम ९५ प्रतिशत सकिएको छ । एशियाली विकास बैङ्कको ऋण सहयोगमा निर्माण भइरहेको यो सडक खण्डको लागत ६ अर्ब ३१ करोड रहेको छ ।

पूवी खण्ड अन्तर्गत आबुखैरेनीदेखि जामुनेसम्मको क्षेत्रफल पर्छ । ४१ किलोमिटर लम्बाइ रहेको सडक खण्डको बजार क्षेत्रमा ६ लेन विस्तार गरिएको छ । मुग्लिङ– पोखरा सडकको पूर्वी खण्डको काम चिनियाँ निर्माण कम्पनी चाइना कम्युनिकेशन कम्पनी लिमिटेडले गरिरहेको छ । 

सडक निर्माणमा सबै क्षेत्रको सहयोग भएका कारण निर्माणमा सहज भएको आयोजना निर्देशनालय (ए.डि.बी) का प्रमुख चुडाराज ढकाल बताउनु हुन्छ । मुग्लिङ–पोखरा सडक खण्ड नेपालकै नमूना सडक भएको आयोजना निर्देशक ढकालको भनाइ छ । 

मुग्लिङ–पोखरा सडक खण्डको पूर्वी खण्डमा चार लेनको सडक र रंगरोगनको काम सकिएको आयोजनाले जनाएको छ । यस सडक खण्डमा ५६ वटा पहिलो रहेका छन्, यि मध्ये १८ वटा पहिरो विशेष प्रकारका रहेका र यिनीहरुको अध्यन भइरहेको छ । पूर्वी खण्डमा पर्ने मादी पुल निर्माणको ८० प्रतिशत काम सकिएको छ ।

निर्माण कम्पनीसँग २०७७ माघ १७ मा सडक स्तरोन्नतिको ठेक्का सम्झौता भएको थियो । मुग्लिङ–पोखरा सडक खण्डलाई दुई भागमा विभाजन गरी स्तरोन्नतिको थालनी गरिएको थियो